Pension Reform Program sa SSS Sugdan sa Katapusan sa bulan sa Agosto

Gi-anunsyo sa Social Security System (SSS) nga ipatuman ang Pension Reform Program aron matabangan ang mga pensyonado nga makaangkon og dugang benepisyo ug mas dako nga pondo, ilabi na tungod sa padayon nga pagsaka sa presyo sa mga panaliton (inflation). Kini nga programa gimando ubos sa direktiba sa Presidente sa SSS ug giya sa Republic Act 11199 o Social Security Act, ilalom sa Section 4.

Sumala sa Acting Senior Communication Analyst sa OVP Mindanao South 1 Division SSS, Mona Lorraine M. Tombo, kini nga pagsaka mao na ang katapusan nga ihatag karong tuiga ug wala nay dugang nga pagtaas sa sunod nga mga bulan gawas sa nakatakda na nga schedule.

Para sa retirement pensioners ug total disability pensioners, magsugod og 10% nga pagtaas sa pension sugod Agosto 31, 2025. Sunod niini, aduna pa silay laing pagtaas sa Setyembre 2026 ug Setyembre 2027. Matag tuig, ang pagtaas kay madugang sa naunang kantidad nga nadawat (compounding increase), busa mas dako ang epekto sa dugay nga panahon.

Para sa death ug survivor pensioners, magsugod sila og 5% nga pagtaas sa Setyembre 1, 2025, laing 5% sa Setyembre 2026, ug laing 5% sa Setyembre 2027.

Tumong sa programa nga protektahan sa nagkadako nga inflation ang mga pensioners aron makasabay sa gasto sa panginabuhi ug magpabilin nga igo para sa ilang adlaw-adlaw nga panginahanglan. (Kelvin Aguilon)