Pagpakabana

Ika-26 nga Domingo sa Ordinaryong Panahon (September 28, 2025)
Am 6:1a, 4-7 / Ps 146: 7, 8-9, 9-10 / 1 Timothy 6:11-16 / Lk. 16:19-31

Usa sa mga nindot nga kinaiya sa usa ka tawo mao kining adunay ‘Pagpakabana’: pagpakabana sa atong kaugalingon, sa katilingban, sa kinaiyahan, ug labaw pa sa atong mga kaigsuonan nga nanginahanglan. Kining pagpakabana dili lamang tungod kay aduna kitay ikatabang, kondili, tungod kini sa dakong pagtagad, paghigugma, ug pagbati nga inigsuon – bisan dili nato kaila apan gi-isip nato nga igsuon. Sagad kini nga kinaiya dili kaayo nato matagaan og bili, tungod kay naandan na nato kini sa atong pagkinabuhi adlaw-adlaw, mao nga dili na kaayo nato matagaan og lalom nga pagpamalandong. Ang pagpakabana kabahin sa atong kinabuhi nga unta kanunay magsumikad sa pagbati ug paghigugma. Kasagaran magpakabana lamang kita ngadto sa atong kaigsuonan nga makabalos sa ato-a.

Kini ang dakong pahinumdom kanato sa Ebanghelyo mahitungod sa kinabuhi ni Lazaro – nga usa ka kabus, dunay balatian, naninguha nga makakaon, ug labaw sa tanan, walay nagpakabana. Usahay ang Dios mopadayag sa iyang pagsulay kanato dili sa atong kawad-on, kondili sa atong pagka-anaa. Gigasahan kita sa Dios sa mga butang nga atong gikinahanglan ug gani naghingapin pa kini. Pero ang tumong sa Dios niining tanan nga iyang gigasa kanato – mao man ang kung unsaon nato pagpalambo ug pagpa-ambit niining mga gasa. Ang datong tawo sa Ebanghelyo nakalimot sa katuyuan sa Dios sa iyang pagkadto o pagka-adunahan. Ug kini ang hinungdan nga nag-antus ug nagbasol siya sa kaulahian. Napakyas ang maong dato sa pagpakabana kang Lazaro – napakyas sa pagbuhat sa angayang buhaton.

Nindot kaayo nga pamation nga ikaw gigasahan sa Dios unya dili makalimot sa tumong sa pagpaambit ug pagpakabana sa mga nanginahanglan. Ang tanan magsugod sa pamilya: sa mga ginikan—ang pag-amoma ug pagdisiplina sa mga anak, usa ka lalom nga pagpakabana. Ug sa mga anak—ang pagtahud mao ang labing bililhon nga maikabalos. Sa katilingban nga mao ang atong dakong pamilya, tanan adunay katungdanan sa ‘Pagpakabana’—sa mga kaigsuonan nga gigasahan sa Dios (diha sa pagka-anaa) ang hagit mao ang pagpakabana ug pagpa-ambit sa mga kaigsuonan sa katilingban nga labing-iwit. Ang kinaiya sa Pagpakabana gikan sa Dios, ug ang bunga niini ikalipay ug makapahimuot gayod sa Dios – pagtabang ngadto sa walay ikabalos, kay ang Dios ang magabalos.

Dalaygon ang Dios hangtud sa kahangturan. Amen. (Sem. Mark Anthony Betcher & Sem. Roman Guerrero Venzon)