Ika-80 nga Fiesta ni San Miguel Arkanghel Gisaulog sa GKK Sr. Sto. Niño Lapanday

Niining tuiga, malipayon ug mapasalamaton nga gisaulog sa GKK Sto. Niño Lapanday Chapel ang ika-80 nga Fiesta sa ilang pagdebosyon kang San Miguel Arkanghel, uban ang tema nga: “ANG PAGTOO PANALIPDAN UG ANG MGA SALA LIKAYAN.”

Gipasiugdahan ang kasaulogan sa usa ka Santos nga Misa kaniadtong Septembre 29 sa alas diyes y media sa buntag, nga mao ang pinaka uyokan nga bahin sa Kasaulogan ug pagpasalamat nga gipangulohan ni Rev. Fr. Orlando Angelia, Kura Paroko sa St. Mary of the Perpetual Rosary Parish Buhangin diin masinati ang kusog ug kalig-on sa pagtuo sa komunidad, nga mapasalamaton sa 80 ka tuig nga grasya, panaghiusa, ug panalangin.

Diha sa iyang homiliya, gitagaan og importansya ni Fr. Orly nga dili lamang si San Miguel Arkanghel ang gisaulog sa kapistahan, kon dili apil usab si San Rafael ug si San Gabriel. Gipatin-aw usab niya ang papel nga gikatakda alang kanila.

Si San Miguel, ingon pa niya, mao gyud ang atong manlalaban batok sa yawa ug magpahinumdom kanunay nga adunay tinuod nga gubat tali sa maayo ug dautan. Si San Rafael, nailhan isip mananambal ug manlalakbay, samtang si San Gabriel mao ang mensahero nga nagdala sa mahinungdanong balita sa Dios ngadto sa tawo.

Gipasabot usab ni Fr. Orly nga ang mga Arkanghel dili lang basta mga anghel, kondili sila adunay gihatag nga misyon gikan sa Dios — ang pagka mensahero sa iyang balaang plano.

Gipadangat sa mensahe sa homiliya mao nga kitang mga katawhan mahimong sama usab nila pinaagi sa pagpakigbahin sa Maayong Balita ngadto sa uban. Sa atong tagsa-tagsa ka paagi, mahimong kita mga “anghel” nga magdala sa mensahe sa paglaum ug pagtuo ngadto sa uban.

Dakong pagpasalamat ang gipadangat sa mga GKK Servant Leaders nga walay puas ang pagserbisyo ug pagdumala sa kapilya. Ang ilang matinud-anong pagpangulo naghatag ug inspirasyon sa tanang sakop sa GKK nga magpadayon sa ilang pag-alagad sa Ginoo.

Gipasalamatan usab ang mga sponsors ug tanang nagtabang sa tanang paagi pinaagi sa ilang pagka maayong piniyalan ug suporta, nga nakahatag ug kalampusan sa kasaulogan. Usa usab ka espesyal nga pasidungog ang gihatag sa mga katawhan nga nagtukod ug mitabang sa pagtukod sa kapilya sulod sa 80 ka tuig.

Dili usab malimtan ang among mapasalamatong pag-ila sa tag-iya sa yuta nga gitukuran sa kapilya, sila si Mr. and Mrs. Manoling ug Ninety Cabaguio, alang sa ilang dako nga tabang ug kalooy nga nahimong dakong kabahin sa kasaysayan sa GKK Sto. Niño Lapanday.

Ang kasaulogan sa fiesta usa ka mapadayonong panaw sa pagtoo ug pag-alagad. Sa paggiya ni San Miguel Arkanghel, ang GKK nagpadayon sa pagpakusog sa espirituhanong kinabuhi sa komunidad ug sa pagpangandam sa sunod pang mga katuigan nga puno sa grasya ug panaghiusa.

“San Miguel Arkanghel, ampingi ug giyahi kami kanunay!”

(By Arsenio Berdera Jr. – GKK SoCCom)