SIL Parish Lumondao: 32nd Foundation Day & Installation of Fr. Efren A. Gubac, Jr., bag-ong Kura Paroko

Mipahigayon ang San Isidro Labrador Parish-Lumondao sa usa ka halangdon ug mapasalamatong selebrasyon kaniadtong Oktubre 12, 2025, aron sa pagsaulog sa 32nd Foundation Anniversary ug sa installation sa bag-ong parish priest, si Rev. Fr. Efren Gubac, Jr., kauban sa assistant parish priest, si Fr. Jupiter Morales. Ang maong kalihukan usa ka makasaysayanong higayon sa parokya, nga nagtimaan sa padayon nga paglambo ug paglig-on sa espiritwal nga komunidad sa Lumondao ug kasikbit nga mga barangay.

Ang rite of installation gipangunahan ni Most Rev. Romulo G. Valles, D.D., Archbishop of Davao, uban sa Chancellor Msgr. Jaime Gamboa, nga maoy mibasa sa pormal nga pagtudlo kang Fr. Efren Gubac Jr isip kura paroko sa San Isidro Labrador Parish. Daghang mga parokyano, GKK (Gagmay’ng Kristohanong Katilingban) leaders, ug mga bisita gikan sa lain-laing kapilya ang miduyog sa maong malipayong pagsaulog.

Sa iyang homiliya, gipasidunggan ni Archbishop Valles ang pag-alagad ug dedikasyon sa simbahan, ug iyang giawhag si Fr. Efren nga magpadayon sa iyang misyon isip piniyalan sa parokya, pinaagi sa pagpakita sa maayong panig-ingnan ug pag-alagad nga puno sa gugma ug pagkamatinud-anon. Giila usab sa arsobispo nga daghan ang hagit sa simbahan ug katilingban karon—lakip na ang kawad-on, kakulang sa katarungan, ug korapsyon. Iyang gihulagway ang korapsyon nga “sama sa sakit nga leprosy” nga nagkatag ug nagpalala sa kalisod sa katawhan. “Ang korapsyon dili lang ordinaryong pagpanikas; kini bunga sa kahakog ug pag-abuso sa gahum nga gihatag aron mag-alagad, dili magpasikat,” matod pa niya.

Gipatin-aw usab ni Archbishop Valles ang papel sa simbahan sa pagpalig-on sa pagtuo ug pagtabang sa mga kabus, nga maoy tinuod nga espiritu ni San Isidro Labrador — ang patron sa mga mag-uuma. Sa iyang mensahe, iyang gihangyo ang tanan nga magpabilin nga matinud-anon sa ilang pagtuo ug magtinabangay aron mapalambo ang komunidad pinaagi sa pagkahiusa ug pag-ampo.

Ang selebrasyon naglakip usab sa paghandum sa Indigenous Peoples (IP) Sunday, diin gipasidunggan ang mga lumad nga nagpaningkamot sa pagpreserba sa ilang kultura, yuta, ug pagtuo. Gipasalamatan sa simbahan ang ilang kontribusyon sa kalinaw ug kalamboan sa nasud, ug giawhag ang mga parokyano nga magpakita ug tinuoray nga pagtahod ug pakig-uban kanila.

Sama nga panahon, gipahigayon ang presentation sa Parish Pastoral Council, GKK Leaders, Parish Office Staff, ug mga Household Members nga nagtimaan sa paghiusa ug panag-uban sa pagpangalagad. Gisundan kini sa fellowship lunch program nga puno sa pagpasalamat ug kalipay, diin naghiusa ang mga parokyano ug bisita sa usa ka matahum nga panagtigom.

Ang kasadya dili lang kutob sa Misa ug paniudto, kay adunay usab exhibition game sa mga GSL teams, nga naghatag ug kalingawan ug nagpasig-uli sa espiritu sa panaghiusa sa maayong panag-uban tali sa mga mag-uuma, kabatan-onan, ug mga parokyano.

Sa pagsusi balik sa 32 ka tuig nga kasaysayan sa parokya, si Mrs. Leonida Lim, mipahayag sa iyang pasalamat sa tanan nga nitabang sa pagtukod ug pagpalambo sa San Isidro Labrador Parish. “Bisan daghang pagsulay ug kakulang, ang parokya nagpabilin nga lig-on tungod sa pagkahiusa sa mga katawhan ug sa paggiya ni San Isidro, ang balaang patron sa mga mag-uuma,” matud pa niya.

Nakita usab panahon sa halad sa mga bunga sa uma, nga nagpakita sa pagkamabungahon ug pagpaningkamot sa mga parokyano — usa ka buhing pagpasabot nga sila mga tinuod nga manunud ni San Isidro. Malipayon ang tanang mga parokyano sa mga pasundayag, sayaw, ug pagpadula, nga nagpasig-uli sa espiritu sa kalipay ug pagkahiusa.

Ang maong selebrasyon nagpahinumdom sa tanan nga bisan unsa pa man ang panahon ug pagsulay, ang pagtuo, paglaum, ug gugma sa Diyos magpabilin nga buhi ug lig-on sa Lumondao. Ang 32 ka tuig nga kasaysayan sa San Isidro Labrador Parish usa ka timaan sa pagpadayon sa panaw sa pagtuo, pag-alagad, ug pagkahiusa alang sa katawhan ug kaluwasan.

Pagadaygon ikaw o Ginoo!

(By Gabriel Laguros | SoCCom SILP)