Walking together in Hope: A Synodal Pilgrimage with St. Jude

Subay sa tema nga “Walking together in Hope: A Synodal Pilgrimage with St. Jude”, gisaulog sa St. Jude Shrine Parish ang ika-57 nga kapistahan isip Parokya. Ang pagpanaw isip katilingban nga kauban ang Paglaum, nga mao si Kristo, usa ka tawag sa panaghiusa dinasig sa kinabuhi ug pagsaksi ni St. Jude.

Nadeklara ang St. Jude Parish isip usa sa 5 ka mga shrines sa Arkidyosis sa Davao niadtong tuig October 27, 2017. Kini ginadagsa sa daghang mga deboto nga nangandoy matabangan sa ilang kahimtang nga imposible ug malisod. Daghang mga testimonia ang nagsaysay sa panabang ni St. Jude sama na lang sa ilang kaayohan sa sakit, kalampusan nga gipangandoy, giya nga gipangayo nga natubag, ug uban pa.

Nahimutang sa taliwala sa busy nga lugar sa syudad Davao sa may dalang Malvar, ginadugok kini sa mga estudyante, pasyente ug ilang mga tagtungod, mga negosyante sa palengke, ug uban pang mga nagabisita sa lain-laing lugar tungod kay gidungog ang ilang mga pag-ampo. Daghan usab ang nangayo sa pasaylo pinaagi sa kumpisal, ug mobisita dili lang sa pagdagkot ug kandila kondili pakigsuod usab sa Ginoo pinaagi sa kahilom sulod sa Blessed Sacrament chapel.

Sa iyang homiliya sa piyesta sa miaging tuig, si Arsobispo Romulo G. Valles nagpahinumdom kanato nga pinaagi kang St. Jude nga usa sa mga apostoles, ang Simbahan, kita nga katawhan sa Dios, adunay koneksiyon sa Ginoo. Kini tungod kay ang mga apostoles nakakita, nakahikap, nakauban ug nakadungog gayod kang Kristo. Mao nga makapangayo kita direkta sa Ginoo pinaagi sa mga apostoles ug mga Santos.

Usa sa miagi nga kura paroko, si Fr. Pete Lamata, dili mahikalimot sa kaayohan gikan sa iyang pagka sakit, sa panabang ni St. Jude. Iya kining gipasigarbo nga tungod kang St. Jude siya naayo sa iyang sakit diin siya daw bukog ug panit na lamang. Daghan ang nagtoo nga lisod ang kahimtang ni Fr. Lamata sa maong sakit. Apan makatandog nga usa ka adlaw niana, nakabangon na siya ug wala madugay makamisa na bisan anaa lamang sa iyang wheel chair.

Nagpadayon ang maong shrine sa pagkakaron, ilabina niining panahon nga puno sa mga hagit niining panahona, sa panahon nga daw wala nay paglaum, sa paghatag og kahigayonan nga makapahulay ang mga gikapoy, makapbugnaw ang mga nainitan sa ilang espirituhanong kinabuhi ug makaginahawa ang mga naglisod. Ang bag-ong maabtik nga kura paroko mao si Reb. Padre Leonardo Dublan, Jr.