Kanus-a man moabot?

Ika-2 Domingo sa Advento (December 7, 2025)
Is 11:1-10 / Ps 72:1-2, 7-8, 12-13, 17 / Rom 15:4-9 / Mt 3:1-12

Daghan kanato ang nawad-an sa pasensya sa pagpaabot? Daghan ang nangutana hangtod kanus-a man moabot ang hustisya ug kalinaw? Niining ikaduhang Domingo sa Adbiyento, gidasig kita unsaon pagpuyo sa matuod nga diwa sa pagpaabot.

Una, diha sa Ebanghelyo, kita gipahimangnoan sa pagbunga isip pagmatuod nga kita naghinulsol. Mao gani nga sa Nobyembre 30, 2025 isip Arkidyosis sa Davao kita isip mga parokya giawhag sa paghimo sa penitential walk ug mga pag-ampo nga motak-op pinaagi sa Misa. Kung kita tinuod nga naghinulsol isip pagpadayag sa atong pagpaabot sa pagkatawo sa Manunubos, mahimo kang mangutana unsa ba ang mga bunga diha sa maayong buhat ang akong napuy-an ug padayong gipaningkamutan? Unsaon ba nako paglahutay sa pagpuyo nga pinili unsay makaayo sa tanan?

Ikaduha, madungog nato sa ikaduhang pagbasa ang panawagan ni San Pablo sa mga taga Roma. Sama kanila kita usab gitawag sa maayong kinaiya sa pagdawat sa usa’g usa inay ang pagdinautay. Giampoan kita niya nga molahutay ug magdasigay sa pagpakig-alayon sa usa’g usa ug dili ang pagduot aron maalaot ug mosamot kita nga maglisod. Isip pagpaabot sa Dios nakadawat ka ba sa pagkulang sa uban? Makahimo ka ba uban sa pasensya sa pagsubay sa angay aron mo balik ang maayong pagtagad ug harmoniya?

Ikatulo, nagpabalik kanato sama sa paglaum sa panahon ni Propeta Isaias sa katawhan nga nag paabot sa maghuhukom nga modapig sa mga kabus. Sama sa ilang panahon, ang paghandum sa umaabot nga pagkatawo sa Manunubos maghatod kanato sa kalingkawasan sa kapaitbug kalisod. Wala na unya kadaot sa atong nasod. Mapuno na unya kita sa pag-ila sa Dios. Isip pagpaabot sa paghandum sa pagkatawo sa Manunubos, mahimo ba akong instrumento sa kabugnaw alang sa pakig-uli sa nahanaw nga pagsalig? Makatabang ba ako nga ang pagpahiduol sa usa’g usa mobuntog sa lala sa kapungot ug kasuko?

Ang tawo nga mahinangpong nagpaabot sa kahingpitan sa buhat sa Manunubos, andam nga mobunga sa maayong buhat, padayong mopakita sa maayong pagtagad alang sa kabag-ohan, ug mohimo og lakang alang sa pagtambayaong aron mobangon ang katikingban. Sayod siya nga ang kaangayan ug hustisya molambo sa iyang panahon ug ang hingpit nga kalinaw hangtod sa kahangturan.