Marian Procession & Divine Cosplay sa HFP Gipahigayon

Usa ka mahinungdanong adlaw alang sa tanan ang Oktubre 31, katapusang adlaw sa Bulan sa Rosaryo ug ang Nobyembre 1, Adlaw sa mga Santos. Kini mas nahimong labing makahuluganon sa mga parokyano sa Sagrada Pamilya tungod kay sa unang higayon, nahatagan ug mas halawom nga kahulugan ning duha ka selebrasyon pinaagi sa pag-aghat sa mga parokyano sa paghatag ug aktibong partisipasyon.

Niadtong ulahing adlaw sa Oktubre nagpahigayon ug prusisyon ang parokya kung diin makita ang pipila ka mga imahe ni Santa Maria nga apil sa Unang Marian Exhibit sa Parokya nga gipahigayon niadtong Oktubre 26 – 30. Ang prusisyon sa mga imahe ni Birhen Maria nagpakita sa dakong pagmahal ug pagrespeto sa mga magtutuo kang Maria nga Inahan ni Jesus nga nahimo usab nato nga inahan. Isip katapusang adlaw sa Bulan sa Rosaryo, gipakita sa kadaghanan ang ilang debosyon sa Mahal nga Birhen tungod sa iyang dakong papel sa atong kaluwasan.

Atol usab sa maong prusisyon, makita ang mga parokyano nga nisalmot sa Divine Cosplay, nagsuot ug mga bisti sumala sa mga santong buot ipaila. Kini gisalmutan sa mga bata, batan-on ug mga hamtong. Gani niabot ug kapin 50 ka mga entries ang natala bisan pa man kini gihimo sa labing unang higayon.

Ang maong aktibidad usa ka maayong ehemplo sa pagtubag sa panawagan nga ibalik ang matuod nga kahulugan sa Nobyembre 1, ang Balaang Adlaw sa mga Santo pinaagi sa pagsimba, pag-ampo ug paghandom sa mga hiyas sa mga Santo, ang atong mga modelo sa pagtuo.

Gilauman nga ang susamang aktibidad nagpadayon ug mulambo pa sa umaabot nga katuigan, butang nga magpadasig pa sa mga parokyano sa pagbuhat ug mga pamaagi nga makapalig-on sa pagtuo. Gipasalamatan usab ni Fr. Dionisio Tabiliran, DCD ang kura-paroko uban iyang kaabag nga si Fr. Danilo Dotollo, DCD ang mga miyembro sa mga GKK ug mga mandated organizations sa kalampusan sa maong aktibidad. (Flor Arellano- Deloria | HFP SoCCom)