Motungas kita nga malipayon sa balay sa atong Dios

Unang Domingo sa Advento (November 30, 2025)
Is 2:1-5 / Ps 122: 1-2, 3-4, 4-5, 6-7, 8-9 / Rom 13:11-14 / Mt 24:37-44

Niining unang Domingo sa Adbiyento, milanog sa mga pagbasa ang ang malipayong pagpuyo alang sa pag-abot sa Manunubos. Unsaon man nato pagpuyo nga malipayon sa pagpaabot sa Manunubos?

Una sa tanan, ang Ebanghelyo nagpahimangno kanato sa paglipay pinaagi sa dili pagpasulabi sa kalibotanon nga kahilayan. Kini ang kalipay sa pagpaabot sa Manunubos pinaagi sa responsable ug pagkamaayong piniyalan. Kini mapakita diha sa paghimo sa matag adlaw nga gimbuhaton sama nga kini gayod ang kabubot-on sa Ginoo. Kung ikaw naghimo isip maayong mag-uuma o magtutudlo o magbalantay sa kalinaw o sa bisan unsa nga trabaho, himoa kini nga daw mao gayod ang buot gipabuhat sa Ginoo kanimo aron dili ka magmahay kon moabot siya sa takna nga wala nimo damha.

Sa ikatudhang pagbasa, si San Pablo nag-awhag sa pagsalikway sa mga salawayon nga buhat ug sa pagpuyo sa kahayag. Ang pagpadala sa lawasnon ug kalibotanon lamang nga katagbawan maghatod kanato sa kapildihan. Dili kini mao ang tiunay nga kalingkawasan sa kalisod nga atong nasinati. Wala diha sa pagpasagad ug sa pagsunod lamang sa tawhanong katagbawan ang solusyon sa pagkab-ot sa kalinaw nga tinuoray. Diha lamang sa pasensiya, pagpaubos, pagkotrolar sa mga gibati anaa ang yawe sa matuod nga kalipay sa presensiya sa Manunubos.

Sa unang pagbasa, ang Propeta naglantaw sa dakong kadaugan pinaagi sa paghari sa kalinaw. Wala nay gubot ug patay ang mahitabo, kondili ang pagkauli sa maayong buot ug ang kahiusa. Kini mahitabo kon kita nga katawhan sa Dios maglakaw subay sa dalan nga Diosnon. Kini motunhay kon magpasulabi ang kamaturoan ug dili ang bakak, ang pagpaubos ug dili ang garbo, ang pagdawat sa kahuyang ug dili ang pagtumo-tumo sa sayop sa uban, ug ang pakighiusa isip tinuoray nga managsuon ug dili ang pagkabahin-bahin tungod sa pagsarili lamang nga pangandoy.

Busa, tagsa-tagsa nato ka pamilya, katilingban ug tibuok nasod, batonan ta ang kontrol sa kaugalingon pinaagi sa pasensiya ug pagbapubos. Likayan ta ang hinaaling katagbawan nga lawasnon lamang. Molihok kita sa kahiusa, aron matod pa sa Salmo, manungas kita nga malipayon sa balay sa atong Dios.