Pamalandong sa usa ka lakaw nga di malimtan

Nahinumdoman nako ang akong kasinatian sa nagkaduol ang adlaw sa Penitential Walk. Biyernes sa gabii, ug wa ko makatulog tungod sa kahadlok nga basin ma-late ko sa dakong kalihokan sa sunod adlaw. Mga alas-diyes sa gabii, kalit lang nga nitingog ang dalugdog ug kusog kaayo ang ulan. Nabalaka ko pag-ayo, naghunahuna nga kung magpadayon ang kusog nga ulan, basin maundang o makansela pa gyud ang tibuok kalihokan. Nag-ampo ko nga unta, mohunong ang ulan, paglabay sa pipila ka minutos, hinay-hinay nga miundang ang kilat ug ulan, salamat sa Diyos! Nakapahuway na gyud ko ug nakatulog mga alas-dose sa kadlawon.

Pagmata nako alas-dos sa buntag, nag-andam dayon ko. Nikaon ko og gamay nga pamahaw, naligo, ug dayon miadto sa balay sa among GKK PSK aron magtapok ug mag-abang og sakyanan padulong sa among starting point sa Coastal Road, Tulip Road Open Space. Pag-abot namo didto, puno na gyud kaayo sa mga tawo. Libo-libo nga mga magtutuo gikan sa lain-laing mga Parokya sa tibuok Archdiocese of Davao. Ang kadasig makita sa ilang mga nawong bisan sayo pa sa buntag. Giduol nako ang among karo nga nagdala sa among patrona, si Our Lady of Lourdes. Pagkakita nako kaniya, mura siyag nagdan-ag sa kalibotan kay matahum, mahigugmaon, ug halangdon siya tan-awon.

Nagsugod ang Penitential Walk pinaagi sa usa ka pag-ampo. Samtang naglakaw ang mga tawo uban sa kandila ug rosaryo, akong gipangkuha ang daghang litrato sa mga partisipante, labi na kadtong mga gikan sa among parokya. Samtang nagpadayon kami sa Penitential Walk, among gi-ampo ang Santo Rosaryo sa tibuok panaw, nga halos upat ka kilometro ang gilay-on.

Tungod sa kadugayon sa panaw, kalit lang nga nahurot ang kuryente sa akong kamera. Wala koy laing mahimo, mao nga ako ug akong kauban nga si Jio migamit sa among cellphone aron ipadayon ang coverage. Pag-abot namo sa kanto sa San Pedro Street, nasorpresa ko sa kadaghan sa mga tawo, mas daghan pa kaysa sa among starting point. Murag dagat sa puti nga mga sinina nga nag-awit ug nag-ampo; kini ang pinakadaghan nga katawhan nga akong nakita sa tibuok kong kinabuhi.

Sa dihang nakaabot kami sa San Pedro Square, aduna pa’y pipila ka minutos sa wala pa magsugod ang misa alas-6 sa buntag, busa nakapahuway mi gamay. Nangita ko og lugar aron i-charge ang akong kamera ug napugos nga mopalit og pagkaon sa duol nga fastfood para lang makagamit sa ilang saksakan.

Pagkahuman nakog charge, dali-dali kong nibalik sa San Pedro Square, sakto ra gyud sa oras. Maayo nalang kay wala ko naulahi sa misa. Paglingi nako sa palibot, makapahupay nga tan-awon ang libo-libong katawhan nga nagtapok, nagsul-ob og puti, nag-ampo, nagpakilooy, dili aron manaway, kondili aron mangayo og kaluoy ug kalinaw.

Wala pa gyud ko makakita ug ingon ani nga pagtigom nga puno sa debosyon ug pagpaubos. Sa homiliya ni Archbishop Romulo G. Valles, D.D., iyang giingon: “We are reminded that we are created in the image and likeness of God. And because of this, we must ask ourselves whether our actions, our society, and our systems still reflect that holy image of God. This Penitential Walk calls us to recognize the grave reality of corruption that our country faces today. We do this not to condemn particular individuals, but to awaken our conscience, and that of the nation.” Ang iyang mensahe nahiangay kaayo sa maong okasyon ug nagpahinumdom kanato nga ang paghinulsol dili lang personal nga pagbag-o, kondili panaw sa tibuok nasud aron mamalandong ug mobalik sa Diyos.

Ang choir nag-awit nga puno sa kadasig ug kahanas, ug ang tibuok misa milamdag sa kalinaw ug paglaum. Human sa misa, nakakuha pa gyud ko og hulagway uban ni Archbishop Valles ug personal nga nakapasalamat kaniya sa iyang pagdumala sa tibuok Archdiocese atol sa maong kalihokan. Pagkahuman sa misa, ang mga miyembro sa SOCCOM nagtagbo sa Rizal Park. Didto among gihisgutan ang resulta sa kalihokan ug ang mga plano para sa kaugmaon sa Archdiocesan SOCCOM Ministry. Pag-uli namo nila Jio ug Ma’am Rowena, among Parish Social Media coordinator, kapoy kaayo ug kulang sa tulog, apan malipayon, mapasalamaton, ug mapanalanginan kami nga nahuman namo ang coverage gikan sinugdanan hangtod katapusan.

Naglaum ko nga mahitabo na usab ang ingon niini nga pagtigom, apan sunod higayon, dili tungod sa paghinulsol, kondili tungod sa kalipay ug pagpasalamat. (Matthew Cadanilla, OLLP SoCCom)