Aduna bay kalipay?

Ika-3 Domingo sa Advento (December 14, 2025)
Isaiah 35:1-6a, 10 / Psalm 146:6-7, 8-9, 9-10 / James 5:7-10 / Matthew 11:2-11

Niining panahon sa krisis ug kaguliyang nga dala sa isyu sa kurapsiyon, aduna bay kalipay nga moabot? Aduna bay kalingkawasan sa kalisod nga atong nahiaguman? Matinuod kaha ang atong kalipay samtang nagkaduol na ang Pasko sa Pagkatawo sa Ginoo?

Sa unang pagbasa, si Propeta Isaias nag-ingon nga ingna ang nakabsan nag paglaom, ‘pagmaisog ug ayaw kahadlok!’ Gidugang niya nga ang nauga nga mga kayutaan magmaya, ug motubo sa disyerto ang kabulakan. Moanhi ang Dios aron manimalos sa kaaway ug maoluwas kanato. Hinaot nga bisan naughan kita sa atong kusog, pangandoy ug bisan sa atong bulsa tungod sa mahal nga palaliton, magmalig-on kita kay moabot ang Dios nga mopildi sa atong kaaway, nga mao ang garbo, kahakog, pagpamakak ug uban pang mga sala. Moluwas siya kanato.

Si Santiago, sa ikaduhang pagbasa, nagdasig kanato nga sama sa mag-uuma nga nagpaabot nga puno sa pasensiya, dili unta kita magreklamo. Hinunoa, magpabilin kitang maningkamot nga mamunga sa maayong buhat. Magbuhat kitag maayo alang sa katilingban, inay maghuna-huna sa kadaot. Ang atong pagkamatinud-anon, kakugi ug lahutay diha sa matag adlaw natong responsibilidad maghatod kanato sa ganti sa kalipay nga gikan sa Dios. Molihok kita sa kaayo sa walay paghikalimot nga ang Dios usab mopatuman sa kaayohan.

Tataw kaayo sa Ebanghelyo nga ang tawo nga dili magduha-duha kang Jesus makakita gayod sa iyang presensiya, makapadayon sa paglakaw, mahinlo sa tanang kahugaw, makadungog sa tawag sa pagtabang sa mas nanginahanglan, ug makabangon sa katilingbanong kaamguhan. Si Jesus nag-awhag sa pagbuka sa atong mga mata ug dalunggan aron masinati nato ang iyang presensiya. Mahimo unta kitang sama kang San Juan nga mensahero sa presensiya sa Ginoo.

Busa, paglipay uban sa pag-ingon, umanhi ka, Ginoo ug luwasa kami! Ayaw kahadlok. Ayaw kawala sa pasensiya. Ayaw paguduha-duha sa Dios nga naglihok sa atong taliwala.