Ang Pagpangawkaw Makauulaw: Parish-wide Penitential Walk gipahigayon isip padayong tubag sa tawag sa pagbag-o ug paghinulsol

Nagpadayon sa mas lawom nga panaw sa paghinulsol ug pag-ampo ang Archdiocese of Davao samtang misalmot ang mga parokya sa Arkidyosis sa Penitential Walk niadtong Nobyembre 30, 2025 nga usa ka lig-on nga tubag sa panawagan sa mga Obispo sa DADITAMA ug sa CBCP alang sa kabag-ohan, hustisya, ug pagsalikway sa kultura sa kurapsyon. Sugod pa sa kadlawon, nagtapok ang katawhan gikan sa nagkalain-laing parokya, naglakaw uban ang usa ka tinguha: ang pag-ampo ug pag-awhag sa usa ka mas matarong ug mas matinud-anong nasud.

Gikan sa St. Mary of the Perpetual Rosary Parish sa Cabantian, San Miguel Parish Panacan, San Isidro Labrador Parish Catalunan Grande, Holy Family Parish Baliok, Virgen de los Remedios Parish Crossing Bayabas, St. Jude Shrine, San Alfonso Maria de Liguori Parish, San Pablo Parish Juna, Sto. Rosario Parish Toril, ug Our Lady of Fatima Parish Poblacion ug uban pa, ang mga parokyano misugod sa ilang Penitential Walk tali sa alas-4 sa buntag hangtod sa ilang 6:00 AM nga Misa. Sa uban, adunay candle-lighting, prayer against corruption, ug freedom walls nga napuno sa mga panghinaot ug mga pamahayag sa katawhan batok sa tanang porma sa pangabuso ug kawalay katarungan. Kini nga lihok nagpadayon sa Archdiocesan Penitential Walk nga gipasiugdahan sa Archdiocese niadtong mas sayo nga bulan.

Sa gabii, mas nagkaiusa ang Archdiocese diin gatusan hangtod kapin libo ka mga tumutuo ang nagtigom sa San Pedro Cathedral alang sa 6:00 PM Mass sa Unang Domingo sa Adbiyento, gipangulohan ni Most Rev. Romulo G. Valles, D.D., Arsobispo sa Davao. Nagdan-ag ang katedral diha sa kahayag sa kandila samtang ang katawhan nag-ampo alang sa kasayuran, kalinaw, ug kabag-ohan sa nasud. Sa iyang mensahe, gipahinumdoman ni Archbishop Valles ang tanan nga isip Katoliko, gitawag kita dili aron mupili og partido o personalidad sa politika, apan aron barugan ang kamatuoran, hustisya, ug kaayohan sa tanan. Giingon niya nga ang konsensya sa usa ka Katoliko nga gipanday sa Ebanghelyo ug sa Catholic Social Teachings maoy mohulma sa atong pag-ampo, desisyon, ug binuhatan.

Gidugang pa ni Arsobispo Valles ang usa ka mas lawom nga pag-awhag: “May the Holy Spirit guide our consciences, strengthen our resolve, and enlighten our leaders, so that our nation may be led toward genuine renewal, justice, and progress for all.” Kini nga panawagan misangpot pag-ayo sa kahimtang sa nasud karon ug naghatag ug direksyon sa espirituhanong intensyon sa Penitential Walk—ang pagpaambit sa paglaum nga ang pagbago magsugod sa kasingkasing sa matag-usa ug molahos ngadto sa kinatibuk-ang kaayohan sa nasud.

Sa pagsugod sa Adbiyento ug sa bag-ong Liturhikanhong Tuig sa Simbahan, gipadungog sa simbahan ang panawagan alang sa kahayag tali sa kangitngit. Ang panahon sa Adbiyento usa ka panahon sa pagpangandam, paghinulsol, ug pagpaabot sa pag-abot sa Mesiyas ug ang Penitential Walk nahimong kongkretong simbolo niining espirituhanong pagpangandam. Ang lihok niining adlawa nagpamatuod nga ang Archdiocese of Davao, uban ang tibuok pwersa sa mga layko, relihiyoso, ug kaparian, nga nagpadayon sa pagbarog alang sa kamatuoran, paglaum, ug hustisya.

Sa pagpanaw sa Simbahan sa Davao sa bag-ong tuig liturhikal, usa ka tin-aw nga mensahe ang nagpadayon sa pag-ubay sa kasingkasing sa mga tumutuo: ang pagbag-o dili lamang usa ka saad, kundili usa ka misyon ug usa ka panaw diha sa pag-ampo, paglihok, ug pagbarug alang sa tinuod nga kahayag ug kaputli sa nasud.