Barug Layko: Tubag Sa Panawagan Batok Korapsyon

Gikan niadtong unang panawagan sa ka-Obispohan sa Pilipinas alang sa pag-angkon sa responsibilidad kon accountability, kamatuoran, hustisya, malinawong katilingbanong kabag-ohan ug batok sa korapsyon nga may kalambigitan sa anomaloso nga mga flood control projects, milihok na karon ang mga layko sa Arkidayosis sa Dabaw pinaagi sa paglusad sa BARUG LAYKO (Bayanihang Layko for Accountability, Reform and Upright Governance) atol sa kasaulogan sa International Human Rights Day.

Kahinumduman nga ang unang hiniusang tubag sa simbahan sa Arkidayosis sa Dabaw mao ang pagpahigayon sa Penitential Walk niadtong Oktubre 25, 2025 nga nagsukad sa tulo ka mga dapit ug naglakaw nga mainampoon ang gibana-banaang 20,000 ka mga katawhan padulong sa San Pedro Square diin gipahigayon ang Santos nga Misa nga gipanguluhan ni Most Rev. Romulo G. Valles. D.D., Arsobispo sa Dabaw.

Gisundan kini sa laing Penitential Walk nga gipahigayon sa nagkalainlaing Parokya niadtong Nobyembre 30, 2025 isip tubag sa Panawagan sa Pag-ampo ug Paglihok nga giluwatan ni Arsobispo Valles.

Sa maong sulat, iyang gipadayag ang panawagan alang sa tanan “sa pagbarog alang sa kamatuoran; sa pagpanalipod sa integridad, sa atong nasud, sa pagbarug batok sa sist ematikong kurapsyon, ug sa paglihok uban ang kasiog, pagkamatinud-anon, ug gugma alang sa katawhan.”

Sa sunod adlaw, nagkatigom ang pipila ka mga layko kinsa nahagit sa maong panawagan ug nagplano alang sa laing halapad nga kalihukan nga pasiugdahan sa mga layko ug gilusad ang BARUG LAYKO niadtong Disyembre 10, 2025.

Usa ka manifesto ang gipadayag sa mga convenors ngadto sa mga mitambong nga layko nga gikan sa nagkalainlaing mga Parokya sa paglusad nga gi-cover sa pipila ka mga vloggers, radyo, telebisyon ug mga peryodista sulod sa San Pedro Auditorium.

Giaghat sa maong pundok si Presidente Ferdinand Marcos Jr., nga maghimo ug hingpit nga buhat sa sakripisyo sa pagkanaog sa pwesto taliwala sa mga nanggawas nga mga kontrobersiya kalabot sa flood control projects nga nahitabo tungod sa mga budget insertions alang sa tuig 2025.

Human sa media forum, gipahigayon ang paglagda sa MANIFESTO sa mga nanambong ug ang pagsaulog sa Santos nga Misa nga gipanguluhan ni Reb. P. Junel Bustamante ug ang ang nag homiliya mao si Reb. P. Leonardo Dublan, Jr., ang kura paroko sa St. Jude Parish ug Direktor sa Archdiocesan Social Action Center (ASAC).

Sa iyang homiliya, gipasabot ni Fr. Dublan nga sa mga nangutana kung asa ang simbahan sa maong kalihukan, dakong parte sa simbahan mao man ang mga layko ug sila ang nahilambigit sa pagpauswag sa pamulitika ug maayong pagdumala (good governance}. Busa mapasalamaton ang mga nanguna sa katawhan alang sa kaugmaon ug wala mahimulag sa simbahan sanglit ang layko man ang lawas simbahan.

Gipadayag ni Fr. Dublan ang iyang kalipay sa iyang nasaksihan tungod kay dunay bag-ong direksyon ug usa ka bag-ong “blueprint” ug kinahanglan nga klarong maghunahuna isip usa ka simbahan nga nakat-onan sa yugo ni Kristo sanglit ang maong yugo maoy makahupay sa huyang nga mga tuhod.

Siya midugang nga daghang ang moingon nga “Amahan, mag-ampo kita aron nga ang Dyos na ang mag-atiman sa tanan. Maghulat kita sa unsa man ang mahulog gikan sa langit, “Let Him send another president.”

Apan, siya nagkanayon nga si Kristo buot nga makig-uban sa iyang katawhan ug “We should be His body in correcting and working together for the right path of our government right now.”

Giangkon ni Fr. Dublan nga nadasig siya sa gihimo sa mga layko nga maoy naningkamot sa paghugpong aron mobarug batok sa korapsyon.

Human sa Santos nga Misa gihimo ang pagdagkot sa mga kandila nga dala sa mga nanambong sa ganghaan sa simbahan diin sa makausa pa hiniusang gipadayag ang panawagan sa pagkanaog sa pwesto ni Marcos Jr.

Nagplano na karon ang BARUG Layko alang sa mosunod nga mga kalihukan sa pagpakaylap sa kampanya ngadto sa mga Parokya ug mga Gagmay’ng Kristohanong Katilingban.