Birhen Maria, Sumbanan Sa Paglaum sa Nagapanaw nga Piniyalang Katilingban

Nahimong mabulokon ang kasaulogan sa ika-62 nga kapistahan sa Imakulada Konsepsyon sa Gagmayng Kristohanong Katilingban (GKK) sa Zone 10, Matina Gravahan, sakop sa Ascension of the Lord Parish nga gisaulog mismo sa Pangilin kon Solemnidad sa Imakulada Konsepsyon, Disyembre 8, 2025.

Gibutyag sa Pangulo sa Katilingban (PSK) nga si Jimmy Libres nga sa dugay nang katuigan, karon pa lamang nausab nga natunong gayud ang kapistahan sa Disyembre 8 sanglit kanunay nga ginasaulog kini sa pinakaduol nga adlawng Sabado kaniadto sa wala pa mapagawas ang Republic Act No. 10966 kon “an Act Declaring December 8 of Every Year a Special Non-Working Holiday in the Entire Country to Commemorate the Feast of the Immaculate Conception of Mary, the Principal Patroness of the Philippines.”

Gawas pa niini, dunay daghang mga dungan nga nagpista sa Parokya sa Ascension of the Lord busa kinahanglan nga managlahi ang oras ug adlaw sa Kasaulogan sa Misa sa Kapistahan.

Karon nga napahiluna ang petsa nga tunong gayud sa Disyembre 8, dakong kalipay kini alang sa mga sakop sa ICC GKK, si Libres nagkanayon, gawas pa nga mismong ang bag-ong kura paroko ang nagmisa sa kapistahan, nga si Reb. P. Jose Junar dela Victoria.

Gipasabot ni Fr. Dela Victoria nga ang gisaulog sa maong adlaw mao ang pagpanamkon sa inahan ni Birhen Maria kaniya nga si Santa Ana busa gitawag siya nga Imakulada Konsepsyon, gipanamkon nga walay sala.

Base sa tema, nga “BIRHEN MARIA, SUMBANAN SA PAGLAUM SA NAGAPANAW NGA PNIYALANG KATILINGBAN,” gidasig ni Fr. Dela Victoria nga ang paglaum usa ka gasa nga ang Diyos lamang ang makahatag pinaagi sa Espiritu Santo.

“Kay sumbanan man si Birhen Maria sa paglaum,” si Fr. Dela Victoria nagkanayon, “tungod niini, iyang gidala kini, iyang gipuy-an.” Diha sa Ebanghelyo, midugang siya nga ang putli nga pagpanamkon kang Maria maoy sinugdanan sa iyang ministriya sa iyang dakong papel alang sa kaluwasan sa tanang katawhan, ang pinili nga maoy magdala sa Manunubos nga si HesuKristo dinhi sa kalibutan base sa plano sa Ginoo sukad pa sa sinugdanan.

Busa, gidasig usab niya ang mga nanambong sa Misa nga dili sulagma ang tanan kay lakip na kini sa plano sa Ginoo hasta ang presensiya sa mga mitambong ug ilabi na sa mga piniyalang mga GKK Servant Leaders (GSL) kinsa nahisakop sa ALP nga nagdusu sa pagka-piniyalan sulod na sa kinse ka tuig. Gisaulog sa Parokya ang ika-15 ka tuig sa Spirituality of Stewadship atol sa bisperas sa pangilin sa Imakulada Konsepsyon didto sa ALP Multi-Purpose Building.

Matud ni Fr. Dela Victoria, si Birhen nakasabot sa gasa sa paglaum nga iyang gidawat ug sa iyang pagdawat gihimo niya kining misyon, nga Inahan ni Hesus.

Sama sa labing edaran nga mitambong sa Misa nga si Nanay Prima, 80 kapin anyos, gipasalamatan siya ni Fr. Dela Victoria sa iyang pagka-malahutayon ug midawat sa gasa nga mahimong piniyalan; ingon man gi-welcome ang labing bag-o nga sakop sa katilingban, ang usa ka upat ka adlaw nga bag-ong natawo nga bata nga gikugos sa iyang inahan nga ginganlan ug Marianne.

“Siya ang symbol of hope of newness, kita nga nagpadayon, no retreat, no surrender!” panapos ni Fr. Dela Victoria.