Birhen Sa Guadalupe: Giya Sa Malaumong Pagpanaw Sa Dalan Padulong Sa Ginoo

Gisaulog sa Sona Uno ang ika-9 nga kapistahan sa ilang Patron nga mao ang Birhen sa Guadalupe niadtong Sabado, Disyembre 13, 2025 uban sa tema: “Birhen sa Guadalupe Giya sa Malaumong Pagpanaw sa Dalan Padulong sa Ginoo.” Gisalmutan kini sa lima ka GKK nga nahisakop sa parokya sa St. Mary of the Perpetual Rosary Parish na mao ang San Agustin Forestal, St. Joseph the Worker D’Achievers, San Vicente Ferrer Ramon Nena, Sta. Teresita Green Orchard, ug San Roque Cabantian nga mao ang host chapel karong tuiga sa Santos nga Misa.

Isip pahinungod sa Mahal na Birhen sa Guadalupe, nagpahigayon og pag-ampo sa Santos na pagrosaryo sa alas sais y medya sa gabii nga gisundan dayon sa HP nobena. Ang unang adlaw sa nobena Disyembre 4, 2025 Huwebes ug gipangulohan kini sa PSL sa Sta. Teresita, ikaduhang adlaw mao ang PSL sa San Agustin, ikatulong adlaw ang PSL sa San Roque, ika-upat na adlaw PSL sa San Vicente Ferrer, ikalima ka adlaw PSL sa St. Joseph the Worker, ug ang ika-unom hangtod ika-siyam na nobena mao ang PSL sa San Roque. Matag saulog sa HP nobena naghalad og kandila ug mga maanindot na bulak ang matag sakop sa GKK alang kang Birhen sa Guadalupe.

Sa adlaw’ng Biyernes Disyembre 12, 2025 sa alas singko sa kabuntagon gihimo ang pagprusisyon sa Mahal na Birhen sa Guadalupe padulong sa mga nahisakop niini na GKK sa Sona Uno samtang ginaampo ang Santos na Rosaryo.
Sa matag GKK adunay gi-andam na lamesa diin nakabutang ang Imahe sa Mahal na Birhen Maria nga kini usa ka timaan sa atong paghigugma kaniya ug magmalaumon kita sa iyang panabang.

Pagbalik niini sa host chapel GKK San Roque gisunod dayon ang katapusang adlaw sa nobena nga gitambongan sa mga GSLs ug mga miyembro sa nagkadaiyang GKK. Nagsugod ang Santos na Misa sa alas diyes y medya sa buntag nga gipangulohan sa Kura Paroko na si Rev. Fr. Orlando A. Angelia.

Sumala pa ni Fr. Orly nga malipayon kita nga nagkatigom karon sa pagsaulog nato sa pagpasidungog sa Diyos pinaagi ni Birhen Maria sa Guadalupe ang modelo sa pagkama-ampoon, pagkamasinugtanon sa kabubut-on sa Diyos; tuod man sa pagkamapaubsanon sa kasing-kasing kung kining tulo atong puy-an sa atong kinabuhi makaingon kita anak ako ni Mama Mary, makaingon kita sumusunod ako ni Kristo, malipay ang Ginoo kanato.

Human sa Santos na Misa adunay salo-salo alang sa tanan. Sa ala una sa hapon gisugdan ang Christmas party na adunay parlor games, caroling contest, exchange gifts, ug giveaways alang sa tanan. Nahimong malampuson ang maong programa ug mipauli ang tanan na malipayon ug mapasalamaton.

Happy Fiesta Birhen sa Guadalupe!

(By Annielyn A. Abe, GKK SoCCom of San Agustin)