Bituon sa Kabuntagon: Pagsaulog sa Parokya sa Tagakpan sa Pagkaputli ni Maria

Nagsaulog ang San Francisco de Asis Parish – Tagakpan sa Solemnidad sa Immaculate Conception, usa ka dakong adlaw sa obligasyon ug usa sa pinakaimportante nga dogma sa Katolikong Simbahan nga nagpamatuod sa dakong grasya nga gihatag sa Diyos kang Maria nga natawong walay buling sa salang panulundon.

Ang maong piyesta, nga gihimo usab nga National Holiday, naghatag higayon sa katawhan sa pag-ampo, pamalandong, ug pagpasalamat.

Nagsugod ang selebrasyon sayo sa kabuntagon pinaagi sa usa ka Dawn Living Rosary nga nagsugod alas 4:30 sa buntag sa atubangan sa simbahan. Naghiusa ang mga parokyano sa pag-ampo sa Rosaryo uban sa kahayag sa kandila, naghandum sa kinabuhi ug pagkaputli sa Mahal nga Birhen.

Human sa Rosaryo, gipangulohan ni Rev. Fr. Mario B. Holmina, OSJ, ang kura paroko, ang solemne nga Santos nga Misa. Sa homiliya, gipahinumdoman ang tanan sa dakong papel ni Maria sa plano sa kaluwasan ug sa atong tawag sa pagsunod sa iyang pagkamapainubsanon ug pagtuman sa kabubut-on sa Diyos.

Sulod sa misa, mihalad usab ang mga parokyano ug bulak—usa ka simbolo sa gugma, pagpasalamat, ug pagtahod alang sa Inahan sa Diyos.

Ang tibuok selebrasyon nagpahindumdom nga angayan lamang gayud nga kita magpasidungog sa Inahan sa Dios diha sa atong pagpadayon sa atong pag-alagad sa Simbahan ug sa komunidad. (Jeffren Miguel | San Francisco de Asis Parish SoCCom)