Pagsusi

Solemnidad sa Epipaniya sa Atong Ginoo (January 4, 2026)
Is 60:1-6 / Ps 72:1-2, 7-8, 10-11, 12-13 / Eph 3:2-3, 5-6 / Mt 2:1-12

Sa panahon karon, kung dili ka makisusi pag-ayo, mahimo ka nga biktima sa mga bakak. Kinahanglan nga masusihon ka aron dili ka mailad sa mga linlang usahay sa media. Niining Domingo sa pagpadayag sa Dios, gipukaw ang atong pagkamasusihon alang sa mas lalom nga pagsimba kaniya.

Sa Ebanghelyo, gisusi pag-ayo sa mga tawong may kaalam kung asa natawo ang mahimong hari kay nakita man nila ang bituon nga nagpahibalo nga siya natawo na. Mao usab ang hari nagsusi kung hain natawo ang maong bata. Apan magkalahi ang motibo sa ilang pakisusi tungod kay ang mga malaomon nga tawo buot nga maghalad og mga gasa alang sa bata. Apan si Herodes buot adunay dautan nga laraw alang kaniya tungod tay nahasol siya. Niining unang Domingo sa tuig 2026, gihatagan na usab kita sa Dios sa higayon nga mosusi kinsa gayod siya sa atong kinabuhi nga angay natong simbahon.Ang imo ba nga pagsusi sa imong pagtoo ug baruganan tungod ba kay buot ka nga masuod sa Dios o tungod ba kay nahasol ka kay makadawat sa kamatuoran?

Sa ikaduhang pagbasa, si San Pablo nakasusi sa mga tinago nga kamaturoan mahitungod sa misteryo sa Dios tungod sa pagpadayag niini kaniya sa Ginoo. Dili kini tungod lamang kay siya kugihan nga mihimo sa pakigsusi, kondili tungod kay gasa kini sa Dios kaniya nga mapaubsanon nga midawat sa misyon sa pagsangyaw niini. Gitanyag kini kaniya bisan sa dili niya pagkatakos ug angayan tungod kay ang Dios adunay iya nga plano nga dili matugkad sa tawo. Ikaw ba andam nga sa imong pagkaubos ug dili takos mamahimong sama kang San Pablo nga mosangyaw pinaagi sa imong pulong ug buhat sa maayong buhat sa Ginoo?

Sa unang pagbasa, madayag, human sa pagsusi, diha sa kahayag, ang Ginoo nga nagatubag sa panginahanglan sa tawo. Taliwala sa kangitngit, ang Dios modan-ag ug mohatag og kahayag sa mga anaa sa kangitngit ug kalisod. Ang Jesuralem nga iyang instrumento maoy mopaklaro niini sa mga tawo nga masusihon sa iyang mga lihok. Ikaw ba andam nga mamahimong kabahin sa bag-ong Jerusalem nga makatabang pagdan-ag sa mangitngit nga kahimtang sa nasod ug katilingban?

Manghinaot kita nga isip piniyalan nga gitawag sa responsable nga pakiglambigit sa atong palibot, magmasusihon unta kita sa kanunay. Mas molawom unta ang atong pag-ila sa Ginoo aron ang tanan nga ania sa yuta magsimba unta sa Ginoo.