Pahimangno

Pista sa Balaang Pamilya (December 28, 2025)
Sir 3:2-7, 12-14 / Ps 128:1-2, 3, 4-5 / Col 3:12-21 or 3:12-17 / Mt 2:13-15, 19-23

Niining panahon karon, daghan ang mga pamilya nangaluya ug nangabungkag. Kini tungod kay usahay wala nay nakahatag og pahimangno sa hustong padulngan o kaha dili maminaw sa husto nga pahimangno.

Sa Ebanghelyo, kaduha gipahimangnoan si Jose sa Ginoo pinaagi sa anghel: sa paglakaw na sa mga maalamong bisita ug sa pagkamatay na ni Herodes. Bisan unsa pa ug bisan kinsa pa ang nagpahimangno kung walay pagkaabli nga mamati ug mosunod sa pahimangno kawang ang maong pahimangno. Kay bisan unsa pa alang kanato kamaayo ang atong mga plano, kung kini dili mahasubay sa plano sa Ginoo, mapakyas gihapon ang tanan. Salamat na lang sa Dios tungod kay si Jose tawo nga namati sa pahimangno mao nga naluwas niya ang iyang pamilya ug mipuyo sila sa Nazaret. Kinsa ba nga pahimangno ang imong gisunod, sa Dios ba o sa kalibotan, sa mga tawo ba nga dunay kaalam o sa mga bakak diha sa social media?

Sa ikaduhang pagbasa, si San Pablo nag-awhag sa mga taga-Colosas sa pagtinudloay ug pagpahimangnoay uban sa tanang kaalam. Kini aron mapuy-an ang pagkapinili sa Dios diha sa pagpailob, kalooy, pakigdait ug pagpasalamat. Mabatonan gayod sa katilingbang nagpahimangnoay ang maayong relasyon ug pagtagad nga puno sa dungog sa matag usa. Gikinahanglang dili lamang mag-inusara o magpundok-pundok nga magkalaban ang matag usa kung kita nangandoy sa kausaban nga magdala sa tinuod nga kabag-ohan. Magpahimangnoay gayod kita. Nakapahimangno ka ba sa imong isigkaingon aron motunhay ang pagrespeto sa usa’g usa ug ang kaangayan? O nahimo ka ba nga instrumento sa dugang kaguliyang ug pagkaut-ot sa atong nasod?

Sa unang pagbasa, batakan nga pahimangno ni Propeta Sirac ang pagtahod sa mga ginikanan ug ang pag-atiman kanila kung sila luya na. Ang pagtahod sa usa ka anak maoy mas makapalig-on dili lanag sa gitahod, kondili usab sa nagtahod. Taliwala sa mga pagkulang sa mga ginikanan, sila maoy instrumento nga gitugot sa Dios nga matawo ang iyang mga pinalanggang linalang nga adunay tagsa-tagsa ka misyon niining kalibotan. Napuy-an mo ba kining maong batakan nga pahimangno aron motunhay ang kalinaw ug kalipay dili lamang niining panahon sa Pasko, kondili sa tibuok nimong kinabuhi?

Ang Dios wala nagkulang sa iyang pahimango aron kita mosubay kanunay sa hustong dalan padulong kaluwasan. Bulahan ang mahadlokon sa Ginoo ug maglakaw iyang kadalanan.