Parish Level Penitential Walk – Holy Sacrifice Of The Mass

Ang Parish Level Penitential Walk usa ka lokal nga pagpadayon sa Archdiocesan Penitential Walk nga gihimo kaniadtong Oktubre 24, 2025 sa San Pedro Square, diin kapin sa baynte mil ka katawhan ang mitambong ug ang Santos nga Misa gipangulohan ni Most Rev. Romulo G. Valles, D.D., Arsobispo sa Davao. Kini nga kalihukan mao usab ang panawagan sa Simbahang Katolika sa tibuok Pilipinas aron magsugod ug penitensyal nga paglakaw sa matag parokya.

Sa St. Mary of the Perpetual Rosary Parish, aktibong gipahigayon ang Parish Level Penitential Walk niadtong Nobyembre 30, 2025 ubos sa tema, “Make Corruption Shameful Again – Ang Pagpangawkaw Makauulaw,” kauban ang Simbahang Katolika sa Pilipinas. Liboan ka mga parokyano ang mitambong ug mitunol sa ilang panahon alang sa pag-ampo ug pagpakita sa kalig-on sa pagtuo.

Ang Parokya adunay 3 Ka Ruta Ug Starting Points:

Una Phoenix Gas Station, Emily Homes – Zones 1, 2, 5. Ikaduha Flying V Gas Station, Tigatto Km. 8 – Zones 7, 8, 9 ug ang ika-tulo Phoenix Gas Station, Kanto Pag-ibig – Zones 3, 4, 6, 10. Nagsugod ang kalihukan sa alas 4:00 sa kaadlawon pinaagi sa Introductory Prayer, gisundan sa Penitential Walk at 4:15 AM padulong sa Our Lady of the Most Holy Rosary Shrine Grounds nga mao ang tagboanan sa 3 ka ruta.

Ang Santos nga Misa gipahigayon sa alas 6:00 sa buntag, isip konklusyon sa penitential walk. Gipangulohan kini ni Rev. Fr. Orlando Angelia, Parish Priest. Dungan sa liboan ka katawhan, ang Misa usa ka dakong pagpakita sa suporta alang sa panawagan sa transparency ug accountability taliwala sa trahedya ug kurapsyon nga nakaapekto sa nasod.

Sa iyang homiliya, gipasiugda ni Fr. Orly ang pagsugod sa bag-ong tuig sa simbahan – ang First Sunday of Advent. Nagpahinumdom siya nga ang penitensyal nga paglakaw usa ka dakong pag-ampo ug sakripisyo. “Kining atong gibuhat aduna’y dakong kalooy ang Ginoo alang kanato. Padayon kitang mahimong mabinantayon alang sa atong nasud. Nasamaran ang Pilipinas, nasamaran ang atong kasingkasing. Mao nga mag-ampo kita alang sa kabag-ohan ug kaayohan sa tanan. Be vigilant, be watchful. Hinaut magpabilin ang gugma sa Diyos kanatong tanan.”

Gipasabot usab niya ang Pastoral Letter sa atong Arsobispo ug mga Obispo sa Davao, Digos, Tagum ug Mati kon (DaDiTaMa) ang panawagan sa kalooy sa Diyos, pagbag-o sa katawhan, ug hustisya alang sa tanan. Gipatin-aw niya ang kahinungdanon sa pagbuhat sa matarong ug paglikay sa dautan.

Mapasalamatan si Fr. Orly sa sponsors nga mitabang pinaagi sa lugaw, mansanas ug lain pang pagkaon. Dako usab ang pasalamat sa: Buhangin Police Station 5, CTTMO, Barangay Officials sa Tigatto, Cabantian ug Buhangin, Barangay Tanods, City Councilors, Kabatan-onan nga aktibo, GSLs sa matag GKK ug ang Pastoral Team sa kalampusan nga gihimo.

Atol usab sa celebrasyon sa Santos nga Misa gihimo ang pag-launching & Blessing sa Laudato Si’ Garden sa Parokya kini gipangulohan sa Parish Desk for the Care of Creation (PDCC) – PSAM ang pormal nga paglusad ug blessing sa Laudato Si’ Garden atol sa Misa sa unang Domingo sa Adbiyento. (Arsenio “JB” Berdera Jr. – GKK SoCCom of SMPRP Buhangin)