SGB Seminar Gipahigayon sa Parokya sa Sagrada Pamilya

Dul-an sa 70 ka pangulo gikan sa nagkadaiyang GKK ang nisalmot sa gipahigayon nga seminar, Shaping Gospel Bearers (SGB) niadtong Nobyembre 30 nga gipahigayon sa Calasanz de Davao Academy sa Brgy. Baliok. Kasagaran sa mga nitambong mao ang mga miyembro sa Social Communications Committee nga nakaangkon ug mas halawom nga pagpaila sa ilang mga katungdanan isip miyembro sa maong ministriya nga gipasabot ni Mrs. Teresa Lelis, Archdiocesan SoCCom In-charge. Sa maong higayon, nahatagan ang mga partisipante sa pagklaro sa mga pamaagi sa komunikasyon isip mga magsasangyaw sa maayong balita sa lain-lain nga mga pamaagi.

Kauban usab sa maong panagtigom si Mrs. Annie Libres, ang Program Head sa DXGN 89.9 Spirit FM, nga nagpaambit sa kasaysayan sa DXGN ug sa Davao Catholic Herald. Matod niya ang tumong sa maong pagpadayon sa operasyon sa Katolikong radyo ug mantalaan mao ang pagpakaylap sa mga katikaran sa atong simbahan, pagpalambo sa pagtuo sa katawhan ug ang kanunay nga pagpaminaw sa Maayong Balita. Iya usab gipaila-ila ang mga programa sa radyo nga makatabang sa pagbaton ug perspektibo ug mithi nga subay sa pagtulun-an sa simbahan.

Anaa usab si Mrs. Analie Plaza, ang Marketing in-charge nga nitubag sa mga pangutana ug unsaon pagtabang aron mapadayon ang pagsibya sa mga programa sa radyo ug sa pamantalaan. Iyang gikalipay ang kaikag sa mga partisipante sa pagpadayag nga andam musuporta sa mga programa bisan sa ginagmay nga pamaagi sama sa Piso Para sa Radyo ug Piso Para sa Diyaryo.

Si Fr. Ritsche Gamaya, Managing Director sa DXGN 89.9 Spirit FM-Davao ug Davao Catholic Herald, namulong bahin saInter Mirifica kung diin gipasabot nga ang mga matang sa medya nga usa sa mga katingalahang butang nga gasa gikan sa Dios busa kinahanglan kini atimanon, palambuon ug paga-ampingan. Dugang niya nga isip simbahan ipadayon ang paghimo sa katungdanan nga mugiya sa katawhan sa hustong paggamit sa medya, ug ang mga Katoliko gidasig nga mosuporta ug makiglambigit sa maayong porma sa komunikasyon. Gidasig usab niya ang mga nisalmot sa seminar nga mahimong kabahin sa nag-inusarang Katolikong radyo ug mantalaan.

Gikalipay kaayo kinii sa mga nanambong tungod nakapahigmata kini kanila nga adunay dako nga responsibidad ang medya sa pag-umol sa maayong pamatasan, paghatag ug giya sa matag pamilya ug kabatan-onan, pagdasig sa matag Katoliko sa pagtubag sa mga panawagan sa simbahan.

Nagmalampusan ang maong seminar pinaagi sa pag-aghat sa mga Pangulo sa Katilingban nga magpadala ug mga representante gikan sa ilang GKK. Kabahin sa maong kalampusan ang hiusang lihok sa mga miyembro sa komitiba, suporta sa kura-paroko, Fr. Dionisio, Tabliran ug Fr. Dindo Pescos, Sch.P., Director sa Calansanz de Davao Academy. (Flor Arellano-Deloria | HFP SoCCom)