Timailhan, Saad, Katumanan

Ika-4 Domingo sa Advento (December 21, 2025)
Is 7:10-14 / Ps 24:1-2, 3-4, 5-6 / Rom 1:1-7 / Mt 1:18-24

Sa panahon sa kalisod, unsa bay timailhan nga makahatag nimog paglaum? Unsa ba nga panaad ang gilauman nimo nga matuman?

Niining ikaupat nga Domingo sa Adbiyento, gihatagan kitag kahigayonan sa Dios nga mosusi sa mga timailhan sa iyang kaayo ug pagpangga. Sama sa unang pagbasa, dili unta kita magdumili sa pagkakita sa mga gipadala sa Dios nga mga timailhan sa iyang pagmahal kanato. Nakita mo ba kining mga timailhan diha sa mga tawo nga nahimat nimo o sa mga hitabo ug mga butang nga imong nasinati?

Sa ikaduhang pagbasa, gipasabot ni San Pablo nga diha sa iyang kinabuhi mismo iyang nasinati ang saad kaniadto sa Ginoo. Kini gitagna, gipahibalo ug gisangyaw sa daghang mga propeta kung unsaon pag pili sa Dios ang iyang katawhan alang sa misyon sa kaluwasan sa uban. Nabati mo ba ang saad sa Dios nga diha sa imong pagdawat kaniya ikaw mahimong kabahin sa iyang pag-abot sa atong taliwala? Gidawat mo ba ang malaumon niyang saad nga sa imong pagsanong mabag-o ang iyang Pinili ng katawhan?

Sa Ebanghelyo, gisaysay ang katumanan sa saad sa Dios kaniadto pinaagi kang Jose, Maria ug ang batang Jesus nga gipakatawo. Natuman ang tanan bisan nga sa unahan nag duha-duha si Jose. Napahitabo ang tanan bisan sa mga pangutana ni Maria. Nahimong posible ang tanan diha sa mapaubsanong Hari nga nagpakabata ug gitanyag nga kalian-on sa katawhan diha pasungan. Niining nagsingabot nga kapaskuhan, sa unsang paagi ka ba mahimong kabahin sa katumanan sa plano ug saad sa Dios?

Hinaot unta nga andam na kita ug nabuka ang atong mga mata sa mga timailhan ug sa saad sa Dios nga natuman sa iyang panahon. Busa, pasudla siya kay siya ang Hari sa himaya!