Ang Ginoo Manalangin sa Iyang Katawhan Uban sa Kalinaw

Pista sa Pagbunyag sa Ginoo (January 11, 2026)
Is 42:1-4, 6-7 / Ps 29:1-2, 3-4, 9-10 / Acts 10:34-38 / Mt 3:13-17

Si Santo Papa Leo miingon nga ang kalinaw maoy maghiusa sa tanang katawhan sa pagpangita sa kaangayan. Apan unsaon man nato pagpuyo sa kalinaw nga dinasig sa Ebanghelyo karon?

Pinaagi sa tingog gikan sa langit, motuo unta kita sa Pulong nga mipuyo uban kanato. Sa pagbunyag ni Jesukristo naabli ang langit alang sa mga tawo nga namatay sa sala. Hinaot nga tinuod unta nga maabli ang langit niining bag-ong tuig pinaagi sa atong pagsaksi sa mga maayong buhat nga makapahimuot sa Dios. Sama sa gisulti sa unang pagbasa, mahulma unta kita sa kaangayan ug dili ang pagtago sa kamatuoran. Magpuyo unta kita diha sa kahayag sa maayong buhat ug dili sa pagkabuta tungod sa garbo ug kahakog.

Pinaagi sa pagkunsad sa Espiritu Santo sama sa salampati, kita unta mahibalo nga si Kristo ang suluguon sa Amahan nga gidihogan sa lana sa kalipay ug gipadala aron pagsangyaw sa Maayong Balita. Kini maoy gisaysay sa ikaduhang pagbasa. Mabuhi unta si Jesukristo sa tagsa-tagsa kanato pinaagi sa atong pagbuhat og maayo ug sa pag-alim sa tanang gilupigan. Mobalik kita sa matuod nga kahadlok sa Dios, ang kahadlok nga magpalikay kanato sa sala.

Pinaagi sa mga tubig sa Jordan kita unta makaila sa bag-ong bunyag. Sa nadungog nato sa Ebanghelyo, mahimuot unta kanato ang Ginoo nga miangkon kanato nga iyang anak sama sa iyang pag-angkon kang Jesukristo nga nakapahimuot kaniya. Molanog ug modalugdog unta, sama diha sa Salmo, ang tingog sa Dios dinhi kanato pinaagi sa dayag nato nga buhat nga subay sa atong konsensiya. Dili lamang unta mahimuot kanato ang pipila ug kadtong kang kinsa kita mibatig utang-kabubot-on, kondili ang Dios nga diin ang tanan kaniya naggikan ang unsay ania kanato.

Subay sa kahulogan sa bunyag sa atong Ginoong Jesukristo, dili unta kita sirado sa atong kaugalingon sa pagpatunhay sa kalinaw, sugod sa tagsa-tagsa kanato ug sa atong nasod. Gamhan unta kita sa panalangin sa Ginoo alang sa pagpatunhay sa kalinaw!