Bulahan Ang Kabos

Ika-4 na Domingo sa Ordinaryong Panahon (February 1, 2026)
Zep 2:3; 3:12-13 / Ps 146:6-7, 8-9, 9-10 / 1 Cor 1:26-31 / Mt 5:1-12

Sa imong kalisod ug pagsakit, duna bay niduol nimo og miingon nga swerte og bulahan ka? Sa panahon nga nabagsak ka ug gidaug-daog duna bay miingon kanimo nga swerte ug bulahan ka?

Si Jesus, diha sa Ebanghelyo miingon nga bulahan ang kabos, dili tungod sa ilang kakabos, kondili tungod kay diha sa ilang kakabos nakigsuod sila sa Dios, misalig sila sa Ginoo. Wala silay laing gisaligan nga kabtangan, posisyon o kusog, kondili ang Dios lamang. Sukwahi kini sa uban nga misalig sa ilang gahum, butang o hawod nga kahimtang ug wala mosimba sa Dios.

Sa ikaduhang pagbasa puno sa pagmahal ang pagpaamgo ni San Pablo niadtong mga gipili sa Dios nga huyang ug walay alang aron maulawan ang anaa sa gahum ug adunay impluwensiya. Gidasig ni San Pablo nga dako ang pabor sa Ginoo kanila nga anaa sa ubos ug yano nga kahimtang kay anaa kanila ang kamot sa Ginoo nga nabalipod ug nagbayaw kanila. Busa, ayaw na pangandoy sa pagpahitaas ug gahum kay gihatag kini sa Ginoo niadtong abli sa iyang pagbalaan kanila.

Angayan lamang nga, sama sa unang pagbasa, huptan nato ang pagbuhat sa gisugo sa Ginoo diha sa katarung ug kaangayan. Ang gikinahanglan mao ang dili pagpamintaha sa uban ug pagpanghilabot sa dili atoa aron mahimuot ang Ginoo ug maangkon ang panalangin sa kalinaw ug kalipay sa kinahiladman. Ang matinud-anon molambo sa tinuoray. Maut-ot ang bakakon ug tikasan.

Busa, swerte ug bulahan ka kung buot ka nga mahilakip sa gingharian sa Dios. Salig nga sa imong kakabos, kahuyang ug katarong, ikaw dili halayo kaniya. Matod sa Salmo, bulahan ang kabos sa espiritu kay ila ang gingharian sa langit.