Kasalan Sa Parokya: 60 Ka Magtiayon Nakadawat Sa Sakramento Sa Kaminyuon

Malampuson ug mahimayaong gipahigayon sa The Most Sacred Heart Parish, Calinan ang kalihokan nga “Kasalan sa Parokya” niadtong December 20, 2025 diin 60 ka mga magtiayon ang dungan nga nakadawat sa Sakramento sa Kaminyoon. Kini nga talagsaong kalihokan usa ka dakong panalangin alang sa mga pamilya ug sa tibuok parokya.

Ang Misa ug seremonyas gipangulohan sa atong Kura Paroko, Rev. Fr. Pepe Retorca, inubanan sa mga kaubang pari nga sila Fr. Raul ug Fr. Calexto. Pinaagi sa ilang pag-alagad, ang mga magtiayon opisyal nga gihiusa sa sakramento, ug giusa atubangan sa Dios ug sa komunidad sa simbahan.

Sa iyang homiliya, gipasabot ni Fr. Pepe ang kahulugan sa kaminyoon ingon usa ka bokasyon—usa ka tawag sa gugma, pagpanag-iya, pagpasaylo, ug pagtuo. Gidasig niya ang mga bag-ong kasal nga padayon nga itugyan sa Dios ang ilang panimalay ug magpuyo sumala sa mga pagtulon-an sa Kristohanong pamilya.

Ang Kasalan sa Parokya usa ka pamatuod sa mainantuson nga pag-atiman sa Simbahan alang sa mga magtiayon, ilabi na kadtong nanginahanglan og tabang aron matuman ang sakramento sa kaminyuon. Puno sa kalipay, paglaum, ug pasalamat ang maong kalihokan, ug nagbilin kini og dakong inspirasyon sa tanang nanambong. Human sa kasalan, malipayon usab nga gidawat sa 2 ka anak sa mga gikasal ang Sakramento sa bunyag.

Padayon nga mag-ampo ang parokya alang sa 60 ka magtiayon nga ilang mapalig-on ang ilang panaghiusa, mapuno sa gugma ang ilang panimalay, ug mahimong buhing saksi sa grasya sa Dios sa komunidad. (Romela Anung-Hiquial, Parish SoCCom)