Kinabuhi Sa Atong Kasing-kasing Ug Panimalay

Ika-3 na Domingo sa Ordinaryong Panahon (January 25, 2026)
Is 8:23 – 9:3 / Ps 27:1, 4, 13-14 / 1 Cor 1:10-13, 17 / Mt. 4:12 – 23

Matag ikatulo nga Domingo sa Ordinaryong Panahon, gisaulog sa tibuok Simbahan ang Domingo sa Pulong sa Dios. Karong tuiga usab, ang tema sa pagsaulog sa Nasud-ong Bulan sa Bibliya matag Enero nagkanayon God’s Word Brings LIFE (Love, Integrity, Faith, Engagement) To Our Hearts And To Our Homes. Sa unsa kahang pamaagi nga ang Pulong sa Dios nagdalag kinabuhi?

Sa unang pagbasa, tataw kaayo ang gugma (Love) sa Dios diha sa iyang pagdan-ag sa iyang kahayag sa katawhan nga kaniadto nagpuyo sa kangitngit. Gani, Siya nga puno sa gugma nagdalag hilabihan nga kalipay, sama sa panahon sa ting-ani, ngadto sa iyang katawhan. Sa iyang gugma, ang Dios naghaw-as kanila sa kabug-at nga ilang gipas-an.

Sa ikaduhang pagbasa, ang integridad (Integrity) o katarong sa mga magtutoo nga gitukod ni San Pablo nga pinadala ni Kristo, anaa diha sa ilang panaghiusa. Gani, si San Pablo nagpahimangno kanila sa pagpuyo nga layo sa pagkabahin-bahin kay si Kristo usa man ug wala nabahin. Ang walay kahiusahan timaan sa panagbulag tungod sa sala – sa garbo, sa kahakog, sa pagpamakak ug uban pa. Ang nagpuyo nga dunay integridad adunay kahiusa sa isigkatawo ug sa Dios.

Sa Salmo Responsoryo, anaa ang pagtoo (Faith) nga kita makakita sa kaayo sa Ginoo, nga mao ang kahayag ug kaluwasan. Ang Salmo nagpadayag sa pagtoo ug pagsalig nga ang Dios maoy atong kadangpan, sa pagtoo ug pagsalig nga makapuyo sa balay sa Ginoo sa tanang mga adlaw sa atong kinabuhi, sa pagtoo ug pagsalig nga makasud-ong kita sa iyang kaayo ug makapamalandong diha sa iyang templo.

Sa Ebanghelyo, gipaklaro ni Jesus ang pakiglambigit (Engagement). Una, ang Ginoo nakiglambigit diha sa pagtuman sa Dios nga ang Zebulun ug Naptali makakita sa kahayag pinaagi sa iyang pagsangyaw sa Maayong Balita. Ug ikaduha, ang Dios naghatag og gibug-aton sa pakiglambigit diha sa iyang pagtawag sa mga una niyang tinun-an gikan sa pagkamananagat ngadto sa pagpanagat og mga tawo. Iyang gipasabot nga ang gugma, integridad ug pagtoo mahimo lamang makahuloganon kung kita andam sa pagpakiglambigit , sama Kaniya nga nagpakatawo, pinaagi sa pag-alagad sa uban, ug dili sa pagpabilin diha sa komportable ug naandan natong kahimtang, sa pagpaharuhay ug seguridad. Kinahanglan nga mobiya kita sa atong mga “comfort zones” ug sul-obon ang kahimtang sa nag kinahanglan natong kaigsuonan. Matod ni anhing Santo Papa Francisco, “Ang kinabuhi motubo pinaagi sa paghatag niini. Maluya kini diha sa pag-inusara ug kaharuhay. Sa pagkatinuod, ang mga nalipay kaayo sa kinabuhi mao kadtong milaya sa kasigurohan sa baybayon ug nahimong madasigon pinaagi sa misyon sa pagpaambit sa kinabuhi ngadto sa uban.”