Pagsaulog sa Sacramento sa Kumpirmasyon sa The Most Sacred Heart of Jesus Parish, Calinan

Niadtong Disyembre 9, 2025, malipayon ug solemne nga gisaulog sa The Most Sacred Heart of Jesus Parish, Calinan, ang pagdawat sa Sacramento sa Kumpirmasyon, usa ka hinungdanong hitabo sa kinabuhing espiritwal sa mga magtutuo.

Ang maong sakramento gihatag sa halangdong Arsobispo, Most Reverend Romulo Valles, D.D., nga naghatag og dakong panalangin ug inspirasyon sa tanang nanambong. Sa iyang mensahe, iyang gipahinumduman ang mga kumpirmandi sa kahulugan sa Kumpirmasyon—ang pagpalig-on sa pagtuo ug ang pagdawat sa Espiritu Santo aron mahimong matinud-anon nga saksi ni Cristo sa komunidad.

Sa kinatibuk-an, 590 ka mga indibidwal ang malampusong midawat sa Sacramento sa Kumpirmasyon, nga nagpakita sa buhi ug aktibong pagtuo sa parokya. Ang maong selebrasyon napuno sa kalipay, pagpasalamat, ug paglaum alang sa padayon nga paglambo sa espiritwal nga kinabuhi sa matag usa.

Ang tibuok parokya uban sa among kura paroko Fr. Pepe ug iyang mga kaabag nga mga pari Fr. Raul ug Fr. Calexto., nagpasalamat sa Dios alang sa grasya nga nadawat ug sa halangdong Obispo nga mitudlo ug mitabang sa pagpalig-on sa pagtuo sa mga anak sa simbahan. Ang maong kalihokan nagpamatuod nga ang The Most Sacred Heart of Jesus Parish magpadayon sa pag-amuma sa pagtuo ug pag-alagad sa Dios ug sa isigkatawo. (Romela Anung-Hiquial)