Usa ka Parokya, Usa ka Pamilya: Tulo ka Selebrasyon Gilunsad sa San Juan Bautista–Lasang

Napuno og kahugyaw ang gymnasium sa Gabriel Taborin College of Davao niadtong ika-28 sa Desyembre, tuig 2025, human magtapok ang mga parokyano sa San Juan Bautista – Lasang alang sa tulo ka dakong selebrasyon: (1) Parish GKK Day; (2) Adlaw sa Holy Family; ug (3) pagsaulog sa adlawng natawhan sa Kura Paroko nga si Rev. Fr. Jemasol “Jojo” Ortiz, DCD.

Nasugdan ang selebrasyon human sa tanang eskedyuladong Misa sa Domingo, diin ang mga parokyano gikan sa tanang walo (8) ka sona sa parokya nagtigom sa nasulting gymnasium. Tungod kay GKK Day ang sentrong selebrasyon, kabahin sa programa ang pagpasundayag sa mga GKK Servant Leaders ug mga miyembro sa GKK nga misaka sa entablado aron ipakita ang ilang mga talento sa pagkanta ug pagsayaw. Kini usab ang giila nga paboritong bahin sa programa sa Parish Vicar nga si Rev. Fr. Alcris Panganiban, DCD. “Ang pinaka-nalingaw ko mao ang mga presentasyon sa nagkalain-laing sona, diin gipakita nila ang ilang nagkadaiyang talento nga nakahatag og kalingawan sa katilingban,” matod niya sa dihang gipangutana kung unsa ang pinakamasadya nga bahin sa kalihokan alang kaniya.

Sulod sa selebrasyon, gipahigayon usab ang grand raffle draw diin adunay napulo ka mga midaog og 50 ka kilo nga bugas, baynte ka mga midaog og 25 ka kilo, traynta ka mga midaog og 10 ka kilo, ug kwarenta’y kwatro ka mga midaog og 5 ka kilo. Ang maong raffle draw kabahin sa mga fund-raising activities sa parokya alang sa planong installation sa solar panel system sa simbahan. “Sa banabana, milapas sa P200,000 ang atong net proceeds,” balita ni Fr. Jojo human sa inisyal ug hapyaw nga cash count. “Very thankful sa turnout. Bisan mubo ra ang panahon sa pagbaligya sa raffle tickets pero grabe ang support sa atong mga GKK,” dugang niya.

Malipayon usab nga gipadayag sa Kura Paroko ang iyang pasalamat sa Parish Youth Apostolate (PYA) nga nanguna sa leg works sa pag-andam sa programa. Samtang giila usab ni Ms. Nessa Lie Eleguen, PYA Coordinator sa parokya, ang tanang kamot nga mitabang gikan sa preparasyon hangtod sa paghinlo ug pagpanumbalik sa lugar. “Ang pagpangandam sa GKK Day nahimong hapsay ug organisado tungod sa panaghiusa ug pagtinabangay sa Parish Coordinating Council, Parish Staff, mga Ministry Heads, Finance Committee, ug sa mga GKK Servant Leaders,” matod niya.

Sa katapusan, ang kalihokan nahimong buhing pamatuod sa lig-on nga panaghiusa sa komunidad sa San Juan Bautista – Lasang, diin ang pagtoo, pag-alagad, ug kalipay naghiusa isip usa ka parokyang nagalakaw uban sa usag usa isip usa ka pamilya. (Aliya Medida)