23rd Parochial Fiesta sa Our Lady of Lourdes Parish Malampusong Gisaulog

Malampuson ug puno sa pagtoo ang pagsaulog sa ika-23 nga Parochial Fiesta sa Our Lady of Lourdes Parish niadtong Pebrero 11, 2026, nga may temang: “Parokyang nagkahiusa malaumong nagpanaw uban ni Birhen Maria sa Lourdes.”

Nagsugod ang kapistahan pinaagi sa Novena Mass niadtong Pebrero 2 hangtod Pebrero 10, 2026. Matag adlaw, ginabuhat ang Santo Rosaryo alas 5:00 sa buntag, gisundan sa Nobena alas 5:30 sa buntag, ug Balaang Misa alas 6:00 sa buntag, gawas niadtong adlaw sa Domingo, February 8 ug sa katapusang adlaw sa nobena. Ang matag Novena Mass gipasiugdahan sa nagkalain-laing Gagmay’ng Kristohanong Katilingban (GKK) gikan sa Distrito 1 hangtod 7, lakip na ang ubang mga ministeryo sa parokya.

Dugang pa, matag GKK adunay kaugalingong Novena Kasaulogan gikan Pebrero 2 hangtod 9, 2026. Sa ikasiyam nga adlaw o Pebrero 10, nagtapok ang tanang GKK sa simbahan sa alas 4:00 sa buntag alang sa Santo Rosaryo, gisundan sa Nobena alas 4:30 sa buntag ug Misa alas 5:00 sa buntag. Human niini, gipahigayon ang motorcade sa imahen sa Birhen sa Lourdes uban sa mga imahen sa patron sa 25 ka GKK, nga nagpakita sa panaghiusa ug pagtoo sa komunidad.

Kabahin usab sa mga kalihokan ang Sakramento sa Pagdihog sa mga Masakiton ug mga Tigulang niadtong Pebrero 6, 2026 sugod alas 8:00 sa buntag pinaagi sa pagpangumpisal sa mga masakiton ug tigulang, nga gisundan sa Balaang Misa alas ug sa aktwal nga pagdihog. Ang Misa gipangunahan ni Rev. Fr. Ricky S. Montero, Parochial Vicar. Kapin sa usa ka gatos ka masakiton ug tigulang ang mitambong. Mitabang usab sa pagpangumpisal ang upat ka pari gikan sa Xavier College Seminary (XaCoSe) ug sa Regional Major Seminary (ReMaSe). Gipahigayon kini niadtong Pebrero 6 imbis Pebrero 11 nga World Day of the Sick aron matutokan pag-ayo ang maong kalihokan.

Niadtong Pebrero 7, 2026 alas 9:00 sa buntag, gipahigayon usab ang Sakramento sa Kumpil alang sa 188 ka mga kandidato gikan sa nagkalain-laing eskwelahan sulod sa hurisdiksyon sa parokya ug sa mga hamtong nga wala pa makumpirmahi. Gipangunahan kini ni Most Rev. Romulo G. Valles, Arsobispo sa Davao. Sa iyang homiliya, gipasabot niya ang kahinungdanon sa Kumpil isip pagpalig-on sa grasya nga nadawat sa Bunyag ug Balaang Eukaristiya.

Sa adlaw mismo sa kapistahan niadtong Pebrero 11, 2026, gipahigayon ang mga Misa alas 5:30 sa buntag nga gipangunahan ni Fr. Ricky S. Montero. Ang solemne nga Misa alas 9:30 sa buntag gi-live broadcast pinaagi sa DXGN 89.9 Spirit FM ug sa opisyal nga Facebook page niini. Gipangulohan ang Misa ni Rev. Fr. Roger “Jing” D. Duhaylungsod, Parish Priest, uban sa mga konselebrante nga sila Fr. Ricky S. Montero, Fr. Ritzchild John S. Cariaga (Homilista), Fr. Jerson Ma. Balili, SDV, ug Fr. Ernesto Salvar, SVD.

Sa iyang homiliya, gipalanug ni Fr. Cariaga nga ang ngalan nga gipaila sa Mahal nga Birhen kang Bernadette Soubirous sa Masabielle, Lourdes, France mao ang, “I am the Immaculate Conception.” Gipasabot niya nga ang pagpaminaw ug pagsunod sa Pulong sa Diyos maghatag kanato og kahayag aron makita ang mga milagro sa atong kinabuhi.

“Be careful of what you feed in your heart through your ears. Be careful of whom you listen to. Be careful also of what you feed in your eyes, ang mga dautan nga makita nimo would really corrupt your heart. But if you feed your ears with the Word of God, it will really help you to be transformed and you will be able to see the goodness in others, and you will see the goodness of others. Hence, do not allow the words of the devil to define your heart, but be transformed with the word of God.” matud pa niya.

Human sa misa nagtapok ang mga Servant Leaders sa Parokya ngadto sa OLLP Gym alang sa salu-salo ug sa mga pasundayag nga gipangandaman sa mga nag-apil nga Gagmayng Kristohanong Katilingban (GKK) ug mga ministeryo sa Parokya. Nanghatag usab ug food packs ang Parokya sa mga nanimba.

Mao pud kini ang unang kapistahan nga nakauban sa mga parokyano ang mga bag-ong kaparian niini nga sila Rev. Fr. Roger D. Duhaylungsod, Parish Priest ug ni Rev. Fr. Ricky S. Montero, Parochial Vicar.

Ang tibuok kapistahan nahimong timaan sa lig-on nga pagtoo, panaghiusa, ug paglaum sa komunidad sa parokya samtang nagpanaw uban ni Birhen Maria sa Lourdes. Among dakong pasalamat sa mga nahimong instrumento sa kalampusan sa among kapistahan ilabi na ang mga sponsors ug mga benefactors ug mga mission partners alang sa live coverage sa Santos nga Misa.

VIVA MARIA! VIVA HESUS!

(By Rowena Baldoza Villaflor, OLLP SoCCom | Photos: Matthew Cadanilla)