Buhata ang kabubot-on sa Dios

Unang Domingo sa Kwaresma (February 22, 2026)
Gn 2:7-9; 3:1-7 / Ps 51:3-4, 5-6, 12-13, 17 / Rom 5: 12-19 or 5:12, 17-19 / Mt 4:1-11

Kinsa ba kanato ang walay sala? Kinsa ba kanato ang wala natintal? Niining unang Domingo sa Kwaresma, gipahimangnoan kita unsaon pag-atubang sa mga tintal sa sala aron mahinlo ang atong kaugalingon ug maandam sa pagsaulog sa Pasko sa pagkabanhaw sa bag-ong kinabuhi.

Ang usa ka sala magsugod sa ginagmay nga tanyag o tintal. Maayo kini nga moagni uban sa panaad sa kalami, kaharuhay, kadako ug kahawod nga maangkon. Kung dili ka makabantay ug makasulod ka na sa mga tintal ang piso nga gikawat mahimong milyones, ang usa ka pagpamakak mahimong batasan, ang pagtilaw sa kaulag mahimong pagkaanad, ug ang simple nga pagpamintaha mahimong pamaagi sa kinabuhi. Busa ayaw palingla sa ginagmay nga paagi sa yawa mga moingon nga mahimo kang maalamon, sama sa pagtintal diha sa unang pagbasa.

Ang pagbuhat sa sala dili lamang maka-apekto sa usa ka tawo nga maoy nagbuhat sa sala. Aduna kiniy epekto sa isigkatawo ug sa katilingban. Kini tungod kay ang matag sala nakadaot man sa maayong relasyon sa isigkatawo. Kung ang gamay nga sala sama lamang sa usa gamay nga samad, ang kahapdos niini mabati sa tibuok parte sa lawas. Busa, angay lamang nga mahimo unta kitang panig-ingnan sa pagkamasinugtanon ug pagpuyo sa katarong, sama sa gisaysay sa ikaduhang pagbasa. Sa pagkamasinugtanon ug katarong ni Jesus kita nahatagag kinabuhi. Busa, sa atong pagdawat kaniya diha sa iyang pulong ug sa pagkalawat, maka-apekto unta kita sa kaayohan alang sa kadaghanan. Sa atong paningkamot sa pagminatarong, mahimo unta kitang makaimpluwensiya alang sa katarong diha sa atong pag gamit pananglit sa social media, sa pag report sa atong trabaho, sa pag negosyo ug bisan gani sa atong binuhatan diha sa atong pamilya.

Ang tintal sa pagbuhat sa sala maayo mopasalig o magpa-asa. Apan kining pasalig ihatag kuno kung mosunod ka sa maninintal. Kining dalan sa nindot nga kahimtang, nga dili pinaagi sa krus, apan sa kaharuhay, maangkon lamang kung mosunod ka sa maninintal. Mao nga kinahanglang magbantay gayod ug magpuyo kita sama Kang Kristo. Wala Siya mosunod sa maninintal kondili sa kabubot-on sa Dios bisan lisod ang pagpas-an sa krus. Wala Siya motuman sa sugo sa pagkamahimong gamhanan o pagka-adunahan o puno sa garbo. Hinunoa, gisunod ug gituman niya ang pagpabilin diha sa Dios nga maoy gamhanan sa tanan, nga maoy tag-iya sa tanan ug nga maoy kahit as-as sa tanan. Didto siya misandig ug mipili sa pagbuhat sa kabubot-on sa Amahan. Kini ang gilarawan sa Ebanghelyo.

Busa, niining panahon sa Kwaresma giawhag kita sa pagmatngon ug mabinantayon sugod sa gagmayng mga tintal, sa dili pagsunod sa tanyag niini. Kondili sa pagbuhat sa kabubot-on Dios Amahan nga maka-apekto sa isigkatawo. Sa atong mga kahuyang ug kalapasan, ang Salmo ampuon ta, kalooy-i kami, Ginoo, kay nakasala kami.