Ipadan-ag Ang Imong Kahayag

Ika-5 na Domingo sa Ordinaryong Panahon (February 8, 2026)
Is 58:7-10 / Ps 112:4-5, 6-7, 8-9 / 1 Cor 2:1-5 / Mt 5:13-16

Unsa bay tumong nimo sa pagbuhat og maayo? Nganong lisod man magbuhat og maayo? Niining ikalima nga Domingo sa Ordinaryong Panahon giawhag kita sa pagbuhat og maayo.

Una, ang Ebanghelyo nagpukaw kanato nga sa panahon nga kita nakadan-ag sa uban pinaagi sa maayong buhat, dili alang kanato ang himaya, kondili sa tinubdan sa maayo nga Mao ang Ginoo. Kung nakasinati kita unsa siya kamaayo, kita usab magpuyo sa kaayo bisan kita politiko o doctor, magtutodlo o mag-uuma, adunahan o kabos. Ang pagbuhat og maayo maoy pagsalamin sa nasinati nga kaayo sa Ginoo ug gipaambit kay dili mahimong ugumon ang kaayo.

Mao nga sa ikaduhang pagbasa, giangkon ni San Pablo nga ang iyang gisangyaw nga kaayo dili tungod ug gikan kaniya, kondili sa Ginoo. Siya nga usa ka huyang nga tawo ug makasasala napili ug gisaligan nga mopalapnag sa kaayo sa Dios nakapukaw og kaayo sa uban nga mohimo sa ingon. Wala siyay ikapasigarbo gawas sa kaalam ug maayong buhat sa Ginoo.

Kining maong kaayo nga nagalamdag isip kahayag mapakita, sama sa gisulti sa unang pagbasa, diha sa pagpaambit sa unsay gikinahanglan sa kabos, sa pag-atiman sa mga walay kapadulngan o sa walay pagpamintaha. Kung kini mapuy-an mosanag gayod ang kahayag sa maayong buhat ug mahanaw ang kangitngit.

Busa, ayaw itago ang kaayo sa Dios pinaagi sa pagbuhat og maayo. Ipadan-ag ang imong kahayag kay ang manggiangayon nga tawo kahayag man ngadto sa mga matarong.