Kinasing-kasing nga pagtuman sa balaod

Ika-6 na Domingo sa Ordinaryong Panahon (February 15, 2026)
Sir 15:15-20 / Ps 119:1-2, 4-5, 17-18, 33-34 / 1 Cor 2:6-10 / Mt 5:17-37

Daghan karon ang nawad-an na sa sakto nga pagsabot sa balaod. Asa man gayod magsukad ang sakto nga balaod ug ang pagsabot niini? Igo na ba ang paghimo sa unsay gisugo apan dili kumbinsido kung ngano nga kini ginahimo?

Ang kalimpyo sa kinahiladman maoy una ug labing importante. Kung hinlo ang pagbati kay walay kasuko, walay puruhan nga makapatay. Kung hinlo ang panan-aw ngadto sa uban nga walay pagtamay, nan walay paghukom. Kung hinlo ang paglantaw sa pamayhon ngadto sa usa ka babaye, nan walay panamastamas ug kaulag. Kung hinlo ang tumong ug dili hinakog, walay kagubot. Sa kasing-kasing magsugod ang tanan. Anaa nagsukad ang tinuod nga pagtuman sa balaod. Kay bisan pa kung misunod ka sa balaod apan ang tumong dili kinasing-kasing, kawang lamang ang tanan. Kini ang tataw nga gipasabot sa Ebanghelyo.

Kinahanglang mabatonan ang kaalam nga gikan sa Dios. Kini maoy mogiya sa pahusga sa mga buluhaton nga dili binase sa kasinatian niining kalibotan karon nga nag-agad lamang sa unsay makita, mahikap, mabati ug matilawan. Ang kaalam sa Dios magtudlo sa pagkakita labaw pa sa nakita sa kadaghanan. Kining kaalam dili madala sa haylo nga materyal, salapi ug gahum. Ang kaalam sa Dios lig-on taliwala sa kalibotanong tanyag. Ipalabi niya dili ang karon lamang apan ang kinabuhi sa umaabot. Kini ang awhag sa ikaduhang pagbasa.

Kung kining maong kaalam maangkon na sa tawo, makapili siya sa unsay maayo. Sa iyang kahadlok nga makalapas sa sugo sa Ginoo, molikay siya sa dautan sama sa pagpamakak, pagpamintaha, pagpangurakot ug pagpanghilabot. Nasayod man siya nga ang pagpili lamang sa maayong buhat maoy magdala Kaniya sa kinabuhingvtunhay. Kini maoy duso sa unang pagbasa.

Busa, ikinasing-kasing gayod ang imong pagtuo isip Kristiyano, aron bisan asa ka, bisan unsa ang imong himuon ug bisan kanus-a, hinlo ang imong kinahiladman. I-ampo ang pag-angkon sa kaalam nga Diosnon, aron makakita ka lagpas pa sa unsay kasagarang gihimo sa mga tawo nga kalibotanon. Pilia kanunay ang maayo ug dili ang lumalabay lamang. Kay matod pa sa Salmo, bulahan ang tawo nga nagasunod sa sugo sa Dios.