Malampusong Pagpasiugda sa Kapistahan sa GKK Sto. Niño sa Gumalang

Malampuson ug puno sa pagtoo ang gihimong usa ka selebrasyon sa kapistahan sa GKK Sto. Niño sa Gumalang, sakop sa The Most Sacred Heart of Jesus Parish, Calinan, diin aktibong miapil ang mga sakop sa komunidad sa nagkadaiyang mga kalihokan nga nagpakita sa ilang hugot nga pagtuo ug panaghiusa.

Sa bisperas sa fiesta niadtong Enero 16, gisugdan ang selebrasyon sa usa ka prusisyon sa alas 4 sa buntag, diin gidala ang balaang imahen sa Sto. Niño palibot sa komunidad. Ang prusisyon giubanan sa mga deboto nga mapainubsanon nga nag-ampo ug nag-awit isip pasalamat ug pangaliya sa panalangin sa Sto. Niño.

Human sa prusisyon, gisundan kini sa Kasalan sa GKK, sa alas 2 ang takna sa hapon nga gipanguluhan sa Parochial Vicar sa parokya sa The Most Sacred Heart of Jesus nga si Fr. Calexto Peligrino, diin duha (2) ka pares sa magtiayon nga sobra na sa lima ka tuig nga nag ipon ang nakadawat sa Sakramento sa kaminyuon. Kini nga hitabo nahimong usa ka dakong panalangin dili lamang sa maong mga magtiayon kon dili usab sa tibuok komunidad, kay nagpakita kini sa kahinungdanon sa sakramento ug sa pagtul-id sa kinabuhi subay sa pagtulon-an sa Simbahan.

Sa adlaw sa kapistahan niadtong Enero 17, 2026, gipadayon ang selebrasyon pinaagi sa Balaan nga Misa, nga gihatag ni Fr. Raul Nieves diin upat (4) ka bata ang malipayon nga nakadawat usab sa Sakramento sa Bunyag. Ang maong hitabo nagpasabot sa bag-ong kinabuhi sa pagtoo ug sa padayon nga pagtubo sa Simbahan pinaagi sa kabataan.

Ang tibuok selebrasyon sa kapistahan sa GKK Sto. Niño sa Gumalang nagpamatuod sa lig-on nga pagtoo, panaghiusa, ug aktibong partisipasyon sa mga katawhan. Daghang salamat sa mga GKK leaders uban ang mga kasikbit nga mga GKK nga nitambong usab sa maong selebrasyon. Mapasalamaton usab ang tanan sa gihimong mga paghalad sa Misa pasalamat ug mga pamisa sa kalag uban usab ang mga kabataan nga naghalad sa ilang mga gasa. Ang kada miyembro naningkamot sa ilang ginagmay nga pamaagi nga makatabang aron magmalampuson ang maong kapistahan. Kini usa ka timaan nga ang Sto. Niño padayon nga naggiya ug nagpanalangin sa komunidad sa Gumalang. (Rosemarie c. Pagaran, GKK Sto.Nino, SocCom)