Pagpalig-on sa Pagtoo ug Serbisyo sa Komunidad

Matag ikaupat nga Dominggo sa Enero, dungan nga gisaulog sa Parokya sa San Miguel–Marahan ang ilang tinuig nga Family Day ug ang anibersaryo sa pagkahimong parokya niadtong Enero 30, 2005. Kini nga mahinungdanong panagtigum, nga nagsugod ubos sa pagdumala ni kanhing Most Rev. Fernando Capalla, D.D.

Ang Holy Cross of Davao College (HCDC) niapil sa selebrasyon pinaagi sa ilang Social Action Office (SAO). Ang ilang presensya nagsilbing pagmatuod sa ilang misyon nga nakasentro kang Kristo ug sa ilang walay puas nga suporta sa pag-alagad ug pagpauswag sa komunidad.

Isip kabahin sa atong misyon sa pag-alagad, pormal natong gitunol ngadto kang Rev. Fr. Ariel T. Bulan, M.J. ang tulo ka mga mahinungdanong proyekto nga gidisenyo aron mohatag og teknikal nga kahibalo ug malungtarong kalamboan sa parokya.

Project WATTS (Workshop for Advancing Technical Training in Safety) ubos sa Bachelor of Science in Computer Engineering, kini nagtumong sa pagbansay sa mga lumulupyo mahitungod sa luwas nga pag-atiman sa kuryente sa panimalay aron malikay sa disgrasya ug makatabang sa panginabuhian.

Project WATTS (Workshop for Advancing Technical Training for Solar Energy) ubos sa Bachelor of Science in Electronics Engineering, kini nagtutok sa pagbansay mahitungod sa renewable energy o solar energy aron mapalig-on ang kahibalo sa komunidad sa paggamit sa teknolohiya nga makatabang sa kinaiyahan.

KonektED (Connecting Communities through Education and Digital Empowerment) ubos sa Bachelor of Science in Information Technology, kini nagtumong sa pagtudlo sa husto nga paggamit sa teknolohiya ug internet (Digital Literacy) aron dili mabiyaan ang komunidad sa dagan sa modernong panahon.

Atol sa selebrasyon, ang Holy Cross of Davao College gihatagan og pasidungog tungod sa walay puas nga pagsuporta ug pakig-alayon sa Parokya sa San Miguel–Marahan. Ang maong pag-ila gidawat sa Social Action Office isip simbolo sa hiniusang misyon sa pagserbisyo ug pagbag-o sa katilingban.

Nagpabilin ang Social Action Office sa ilang baruganan sa pagpalig-on sa relasyon sa mga komunidad sa pagtoo, paggamit sa kahibalo gikan sa tunghaan alang sa makahuluganon nga buluhaton, ug paggiya sa mga komunidad padulong sa usa ka lig-on ug malungtarong kaugmaon. (Jeralyn Babet A. Palero, Social Action Office – Holy Cross of Davao College)