Pagsalig sa Panahon sa Pagsulay

Ika-2 Domingo sa Kwaresma (March 1, 2026)
Gn 12:1-4 / Ps 33:4-5, 18-19, 20, 22 / 2 Tm 1:8-10 / Mt 17:1-9

Asa ka ba nakakuhag kalig-on sa panahon sa pasulay? Kang kinsa ka ba mogunit sa pa panahon sa kalisod?

Diha sa Ebanghelyo, ang kasanag sa panagway ni Jesus ug ang tingog nga nadungog sa mga tinun-an gikan sa langit maoy angay nga kasandigan sa panahon sa pagsulay ug kalisod. Bisan lisod ang pagbiya sa bisyo o sa naandan nga sayop nga binuhatan, angay lamang kini nga biyaan. Walay pagbag-o nga dili makasinati sa kasakit I kalisod o pagsulay. Kay sama sa pagtubo sa lawas ug edad sa tawo, ang adunay lumalabay nga kabug-at nga masinati. Apan mabulahan ang molahutay nga makapaabot sa kahayag. Adunay kasanag sa kagawasan gikan sa pagkaulipon sa sala kanila nga moantus ug mosalig sa Dios.

Mao nga nagdasig si San Pablo kang Timoteo diha sa ikaduhang pagbasa sa pag-ambit sa kalisod sa pagpalapnag sa Maayong Balita. Bisan daghang babag o kabug-at ang pagsaksi sa unsay maayo, ang tawo nga mogakos niini hatagan sa kusog gikan sa Dios. Makasinati man siyag pagsalikway, kakulang sa pagsabot kaniya sa uban o pagpanghimaraot, mopuyo siya sa kaayo kay nasayod siya nga giluwas siya sa Dios. Mao nga ang tawo nga matarong dili magpakatag sa bakak, o panlupig, o pagmapahitas-on o kahakog. Bisan siya masakitan, dili siya maluya sa pagpabilin nga tarong diha sa iyang trabaho, negosyo o katilingban.

Kini nga paglahutay o pagkamitinud-anon tungod sa pagtoo sa saad, sama kang Abraham diha sa unang pagbasa, sa katumanan sa buhat sa pagluwas sa Ginoo. Ang tawo nga masaligon sa panalangin sa Ginoo mapadayunon sa iyang negosyo, o pagtuon, o trabaho nga dili magkwenta sa pagsulay ug kalisod kay mituo man siya nga ang tanang pagsulay kabahin lamang padulong sa maangkon nga panalangin nga walay sulod sa Dios. Mahimo siya nga panalangin usab ngadto sa iyang isigkatawo.

Busa, pagdan-ag, pagsaksi ug paglahutay kay kalooy-an ka sa Ginoo sa imong pagsalig Kaniya. Diha Salmo kita moingon, “Ginoo, maluoybka kabalo kay misalig ako kanimo.”