Pagtoo ug Panaghiusa, gipakita sa ika-15 nga Parochial Fiesta sa Virgen de los Remedios Parish

Gisaulog sa Virgen de los Remedios Parish, Toril, Davao City ang ilang ika-15 nga Parochial Fiesta inubanan sa Installation sa bag-ong Kura Paroko nga si Rev. Fr. Jovilo Bongay, niadtong Pebrero 2, 2026. Ang tema sa kapistahan mao ang “Virgen de los Remedios, Dasiga kami sa among Pagkapiniyalan”, nga nagpakita sa paglaum ug pagpanalipod sa Mahal nga Birhen sa kinabuhi sa matag magtutuo.

Ang maong adlaw usab mao ang Piyesta sa Candelaria ug ang Kapistahan sa Presentasyon sa Atong Ginoong Hesukristo sa Templo. Busa, sa wala pa magsugod ang mga Santos nga Misa, gipahigayon una ang pagbendita sa mga kandila.

Gipanguluhan ang Pontifical Mass sa Arsobispo sa Davao, Most Rev. Romulo G. Valles, D.D., inubanan sa dose ka mga pari gikan sa nagkalain-laing parokya sa arkidiyoses.

Atol sa Installation Rites ni Rev. Fr. Bongay, gipresenta usab ang mga miyembro sa Parish Pastoral Council (PPC), Parish Workers, ug ang bag-ong mga GKK Servant Leaders, isip timailhan sa ilang suporta ug panaghiusa sa bag-ong Kura Paroko.

Gisundan ang selebrasyon sa usa ka “Fiesta sa Nayon” pagkahuman sa Santos nga Misa. Ang mga parokyano ug mga GSLs nagsul-ob ug mga tradisyonal nga sinina sama sa Baro’t Saya, Filipiniana, ug Barong Tagalog, nga naghimo sa selebrasyon nga matahum ug pormal.

Duna usab nagkalain-laing mga kalingawan ug patimpalak, sama sa Booth Making Competition matag distrito ug Retro Dance Competition, nga naghimo sa kapistahan nga mas bibo ug makalingaw.

Sa kinatibuk-an, ang ika-15 nga Parochial Fiesta sa Virgen de los Remedios Parish nahimong usa ka malinawong pagpamatuod sa pagtoo, panaghiusa, ug aktibong partisipasyon sa mga parokyano. Uban sa bag-ong pagpangulo ni Rev. Fr. Jovilo Bongay, ang parokya nagpadayon sa paglaum nga mas molig-on ang pag-alagad ug pagpakabana sa komunidad dili lamang sa mga nag alagad sa simbahan kung dili sa tanang katawhan.

Hinaut unta nga pinaagi sa panalipod sa atong inahan, ang Virgen de los Remedios, magpadayon ang parokya sa paglakaw diha sa pagtoo, gugma, ug pag-alagad alang sa kaayohan sa tanan. (Mary Angeli Santos, VDLRP SoCCom)