20 ka Altar Servers Pormal nga Gidawat isip Pontifical Servers sa San Pedro Cathedral

Baynte (20) ka altar servers ang pormal nga gidawat sa Ministriya sa Pontifical Servers sa San Pedro Cathedral niadtong Domingo, Marso 15, 2026, alas 9:30 sa buntag, atol sa Santos nga Misa sa Ikatulong Domingo sa Kwaresma (Laetare Sunday).

Gipangunahan ni Most Rev. Romulo G. Valles, D.D., Arsobispo sa Davao, ang Rite of Investiture ug Admission diin opisyal nga gidawat ang mga bag-ong Pontifical Servers sa simbahan ug sa Arkidiyosesis sa Davao.

Ang mga nadawat nga Pontifical Servers mao sila si Alberto R. Amora Jr., Donald Zeus Apawan, Renan Bambe, John Benedict P. Buenavista, Riexyl Dalogdog, Chris Gio Edejer, Rafael Espinosa, Arcel Vonn Gallardo, Richard Loremas, John Juner Lawan, Jhondell Lauronal, Neilton Zaren Martinez, Gerald Valle Monteza, King Ely Louie Pegarro, Aljon Parason, Jake Lester Rebajado, Kent Lister Sequitin, Francis Elixer Tupaz, Jechrist Jay Utlang, ug Keint Albert Zamora.

Ang Pontifical Servers adunay espesyal nga papel sa liturhiya, ilabi na sa pag-alagad sa Arsobispo panahon sa Pontifical Masses, solemne nga mga selebrasyon, ug uban pang mahinungdanong kalihukan sa Simbahan.

Sa maong seremonya, solemne nga gidawat sa mga servers ang ilang panaad sa pag-alagad. Gisuportahan usab sila sa ilang mga ginikanan nga mitabang sa pagbestida kanila isip Pontifical Servers.

Matod ni Donald Zeus Apawan, dako ang iyang pasalamat sa Ginoo sa pribilehiyo nga makaalagad sa Santos nga Misa ilabina duol sa mga Obispo.

“Kadtong naglinya nami (paingon sa altar), nakaingon ko, ‘Dios, salamat gayud,’” matod niya.

Samtang si Keint Albert Zamora miingon nga wala siya magdahom nga mapilian.

“Many are called but few are chosen. Padayon gihapon ko sa pagserbisyo sa Simbahan isip pagpasalamat sa pribilehiyo nga gihatag sa Ginoo” matod niya.

Gi-awhag usab ang mga magtutuo nga padayon nga i-ampo ang mga Pontifical Servers ug tanang altar servers sa nagkadaiyang parokya aron magmalig-on sa ilang pagpangalagad dili lamang sa Simbahan kondili usab sa komunidad sa Arkidiyosesis sa Davao. (Kelvin Aguilon)