25 Ka Tuig sa Pagtuo ug Pag-alagad: Panawagan sa Padayon nga Misyon sa GKK San Jose

Gisaulog sa mga tumutuo ang ika-25 nga anibersaryo ug patronal fiesta sa GKK San Jose sa Davao Empress, diin gipasiugda ang pagtuo, pagkamapaubsanon, ug pagkamasinugtanon isip ehemplo ni San Jose. Gipangulohan ang Santos nga Misa ni Rev. Fr. Emmanuel Gonzaga, Kura Paroko sa St. Francis of Assisi Parish Laverna inuban ni Rev. Fr. Rey Sabuero, FSA nga kanhi usab na-assign sa maong parokya.

Sa iyang homiliya, si Fr. Rey, nag-awhag sa mga tumutuo nga sundon ang kinabuhi ni San Jose nga hilom apan matinumanon sa kabubut-on sa Dios.

Gipahinumdom usab sa pari ang unang pagbasa nga naghisgot sa saad sa Dios kang David, nga nagpakita sa pagkamatinud-anon sa Ginoo sa Iyang pulong. Matud niya, ang 25 ka tuig nga panaw sa kapilya usa ka ebidensya sa padayon nga presensya ug giya sa Dios sa komunidad.

Sa ikaduhang pagbasa gikan sa sulat ni San Pablo ngadto sa mga Roma, gipasiugda ang pagtuo ni Abraham nga misalig sa Dios bisan sa kakulang sa kasiguruhan. Gihulagway kini isip parehas sa pagtuo sa mga miyembro sa GKK nga nagpalambo sa ilang kapilya sulod sa daghang tuig.

Sa Ebanghelyo sumala ni San Mateo, gihisgutan ang papel ni San Jose isip usa ka amahan nga masinugtanon ug mapainubsanon. Bisan wala siyay daghang pulong sa Bibliya, ang iyang mga lihok nagpakita sa lig-on nga pagtuo ug pagsalig sa plano sa Dios.

Gipasabot usab ni Fr. Gonzaga nga ang kalampusan sa GKK dili lamang tungod sa liderato kondili sa kooperasyon sa mga miyembro nga andam mohalad sa ilang panahon, kusog, ug gugma alang sa simbahan.

“Ang 25 ka tuig dili lamang selebrasyon sa nangagi, kundili usa ka imbitasyon sa pagpadayon sa misyon,” matud pa niya.

Karon, ang GKK San Jose giila isip usa ka buhing komunidad nga nagpadayon sa pag-alagad ug pagpalig-on sa pagtuo sa sunod nga henerasyon. (Rysan Dolor Macaranas)