Ang Dios Tubag Sa Atong Panginahanglan

Ika-3 Domingo sa Kwaresma (March 8, 2026)
Ex 17:3-7 / Ps 95: 1-2, 6-7, 8-9 / Rom 5:1-2, 5-8 / Jn 4:5-42

Makadungog kita nga ang tawo walay katagbawan. Bisan aduna nay kwarta, mangawkaw pa gihapon. Bisan duna nay para niya manghilabot pa gihapon. Bisan gihatagan na, magkulang pa gihapon.

Sa unang pagbasa, nagbagulbol ang katawhan sa Israel sa dakong pabor sa Ginoo nga giluwas sila. Sa ilang kauhaw, buot silang mobalik sa daang kahimtang sa Ehipto. Apan ang Dios sa iyang kaayo, puno sa pasensya nga mihatag sa ilang panginahanglan sa tubig pinaagi Kang Moises. Nasinati mo ba ang pasensya sa Ginoo sa panahon nga nagreklamo ka? Nakita mo ba ang iyang hinabang bisan usahay nagbagulbol ka?

Sa ikaduhang pagbasa, ang paglaum dili mapakyas. Diha kang Kristo anaa ang kalinaw. Bisan sa atong kagahig ulo, sa atong kamakasasala, ang Dios misakripisyo ug mitahan sa iyang kaugalingon alang kanato. Nakaamgo ka ba nga dili ka angayan apan iya kang gipakamatyan? Nabati mo ba nga bisan sa imong kaubos ang Dios mipaubos usab alang kanimo?

Sa Ebanghelyo, nabisan asa na lamang ang usa ka babaye nga giuhaw sa tinuod nga pagpangga. Buot siya nga makadawat sa tubig nga mao si Kristo, kung asa maangkon ang matuod nga pagdawat ug pagmahal. Nahimamat mo ba ang Ginoo sa imong mga pagkulang kinsa andam sa pagdawat kanimo aron makaplagan nimo ang bili sa imong pagkatawo? O nagpa bilin ka lang ba sa lumalabay nga kalipay nga dili maoy makatagbaw ug makatabang sa imong kalag?

Niining ikatulo nga Domingo sa Kwaresma, giawhag kita sa pag duol kang Kristo, ang tubig sa kinabuhi nga maoy gipangandoy sa atongbkinshiladman. Dili unta kita mosalig lamang sa mga butang lumalabay nga dili makatagbaw, kondili mosandig sa Dios kinsa mohatag sa matuod natong gikinahanglan. Siya ang paglaum nga dili mapakyas. Siya ang tubig nga naghatag sa kinabuhi.