Dili Mobiya Ang Dios Kanato

Bendita sa Lukay (March 29, 2026)
Is 50:4-7 / Ps 22:8-9, 17-18, 19-20, 23-24 / Ph 2:6-11 / Mat 26:14-27:66

Gibati mo ba nga gibiyaan ka sa Dios? Nasinati mo ba nga gisalikway ka? Nakaagi ka ba nga ikaw gipasagdan?

Mao kini ang masinati sa tawo nga iya sa Dios. Kini ang maagian sa tawong matinud-anon sa Ginoo. Kini nadungog nato sa unang pagbasa, kang Propeta Isaias. Bisag gipatara na niya ang iyang nawong, ang Dios milaban kaniya. Mitabang ang Dios sa tawong tinuod mga mosalig kaniya. Taliwala sa pagsalikway dili siya maunsa, kondili maluwas.

Gani, si Kristo mismo sa ikaduhang pagbasa, nga nagpaubos ug nagpaulipon, giisa man sa Amahan. Sa iyang pag balewala sa pagkagamhanan, hinunoa nag-alagad siya, gipataas siya sa Amahan. Kang Kristo nga nagpaubos ug nag matinud-anon nag-alagad ug wala nanumbaling sa pagyubit ug pabiay-biay, ang tanan Kaniya miyukbo. Taliwala sa sumbong ug pagsakit batok Kaniya, si Kristo gisunod ug giyukboan sa tanan.

Mao nga atubangan sa pagbudhi ug pasangil batok kang Kristo diha sa Ebanghelyo, siya miawhag sa iyang mga tinun-an sa pagbangon aron manlakaw. Inay nga ang mga tinun-an mangatulog, sila gipukaw ni Kristo kay anaa na ang magbudhi Kaniya. Kining pagbangon nagpasabot nga magbantay ug magmatngon sila kanunay sa mga mabudhion. Nagpasabot kini nga isip iyang mga tinun-an mahigmata kita batok sa nagpahimulos sa ilang gahom, bahandi, impluwensya ug posisyon. Inay ilang gamiton ang gahom ug pagsakit diha kanila alang sa pag-alagad ug pagpanalipod sa mga gagmay, bantayan nato nga dili pag-abuso ang himuon nila. Mobarug kita sa katungod ug sa angay subay sa balaod sa Dios ug sa tawo aron motunhay ang bag-ong tawo, ang bag-ong kinabuhi, ang bag-ong katilingban. Wala natulog apan nagmata ang Ginoo.

Busa, sa atong pagsulod niining semana santa, magmalig-on kita taliwala sa mabudhion nga sala. Mosalig kita sa pagdapig sa Dios ug magpabiling mapaubsanon kay wala mobiya ang Dios kanato.