Investiture sa Friends of Saint Francis Organization sa Parish sa SFDA Gipahigayon

Sa usa ka maligdong ug espirituhanong panghitabo atol sa unang Misa sa Unang Domingo sa Kuwaresmam, February 22, 2026, gipahigayon ang Rites of Investiture sa Friends of Saint Francis Organization sa Parokya sa San Francisco de Asis. Kini nga mahinungdanong kalihukan kabahin sa paglunsad sa Tuig ni San Francisco sa lebel sa parokya, ubos sa pagpanguna ug espirituhanong giya ni Rev. Fr. Mario B. Holmina, OSJ, paroko.

Human sa pag-ampo sa Post-Communion, ang mga miyembro sa organisasyon gitawag sa atubangan sa komunidad aron modawat sa panalangin ug opisyal nga pagpasakop sa ilang misyon isip mga sumusunod sa espiritu ni San Francisco de Asis. Sa kinatibuk-an, 13 ka miyembro ang opisyal nga gi-invest ug gipanalanginan isip unang grupo sa Friends of Saint Francis Organization sa parokya. Ang investiture usa ka timaan sa ilang lig-on nga saad sa pagkinabuhi sa mga hiyas sa pagkapaubos, pagserbisyo, pagkamahigugmaon sa isigkatawo, ug pag-atiman sa kabuhatan sa Ginoo.

Atol sa rito, gipanalanginan ni Fr. Mario ang mga miyembro isip timaan sa ilang bag-ong panaw sa pag-alagad sulod sa Simbahan ug komunidad. Ang maong selebrasyon dili lamang usa ka seremonyas, kondili usa ka panawagan sa matag miyembro nga mahimong buhing ehemplo sa espiritu ni San Francisco pinaagi sa pag-ampo, pag-alagad, ug pagpakabana sa uban.

Ang investiture sa Friends of Saint Francis Organization nagpakita sa padayon nga pagpalig-on sa pagtuo ug panaghiusa sa parokya, nga nagdasig sa mga tumutuo sa pagkinabuhi nga mas yano, mapainubsanon, ug puno sa gugma sa Diyos ug sa isigkatawo. Kini usab usa ka pahinumdom nga ang pagkasakop sa organisasyon dili lang dungog, kundili usa ka responsibilidad sa pagdala sa kahayag ni Kristo pinaagi sa ehemplo ni San Francisco de Asis.