SMP Panacan SoCCom Lenten Recollection 2026 Gipahigayon

Malampuson gipahigayon niadtong ika-14 sa Marso tuig 2026 ang usa ka makahuluganong Lenten Recollection nga gitambongan sa kapin singkwenta ka mga miyembro sa Social Communications (SOCCOM) Ministry sa San Miguel Parish Panacan, sa Seminar Hall 2. KIni usa ka espiritwal nga panagtigom nga nagtumong sa pagpalalom sa pagtuo ug pagpalig-on sa misyon isip mga alagad sa simbahan.

Gikan sa nagkalain-laing Gagmay’ng Kristohanong Katilingban (GKK), ang mga miyembro miabot nga dala ang ilang personal nga mga kasinatian, mga pagsulay, ug mga inspirasyon sa pagpadayon sa ilang pag-alagad. Bisan pa man sa kalain-laing kahimtang sa kinabuhi, usa ka komon nga tinguha ang naghiusa kanila nga ang paghunong sa kapaspas sa adlaw-adlaw nga buluhaton aron pagpaminaw ug pagbalik pagduol sa Ginoo nga nagtawag kanila sa maong misyon.

Ang kalihokan gipasiugdahan ni Mrs. Theresa “Tere” Arispe Lelis, SoCCom In-charge sa Archdiocese of Davao, nga naghatag og lawom ug makahuluganong pagpamalandong alang sa mga miyembro. Sa iyang mensahe, iyang gipahinumdoman ang tanan nga ang pag-alagad dili lamang usa ka responsibilidad, kondili usa ka tawag gikan sa Diyos nga kinahanglan tubagon uban sa pagkamapainubsanon ug pagkamatinuoron.

Adunay tulo ka bahin ang recollection. Ang una, pagpangita og kauban ug pinaagi sa aktibidad nga pagsulod sa usa ka malong. Kini nagpahinumdom nga ang matag usa kanato dili mag-inusara kay adunay Ginoo nga muoban kanato ug mugakos sama sa malong. Ang ikaduha mao ang pagpa-ambit sa kasinati-an sa kinabuhi nga nagpugong o nagbabag sa pagtubag sa pagpangalagad sa Ginoo, diha sulod sa napiling grupo. Ug sa katapusan mao ang pagpaambit sa mga pinili nga miyembro sa atubangan sa tanan aron sa pagpadayag sa ilang gibati sa maong aktibidad ug unsa ilang ikasulti sa higayon nga ang Ginoo anaa sa atubangan.

Gihatagan usab ni Mrs. Tere og pagtagad ang kamahinungdanon sa pagpadayon sa pag-ingon og “Oo” sa Diyos bisan pa sa mga pagsulay, kakapoy, ug mga higayon sa pagduha-duha. Ang iyang mga pulong nahimong usa ka personal nga pagdapit alang sa matag usa.

Ang maong recollection nagpahinumdom nga ang SOCCOM ministry dili lamang bahin sa pagdokumento sa mga kalihokan o pagpakigbahin sa impormasyon. Labaw pa niini, kini usa ka misyon sa pagpadayag sa Ebanghelyo nga usa ka paagi sa pagpakaylap sa kamatuoran, pagtuo, ug paglaum sulod sa komunidad sa simbahan.

Natapos ang recollection pinaagi sa anticipated Holy Mass nga gipangunahan ni Rev. Fr. Rolando O. Mandreza, DCD, Kura Paroko sa San Miguel Parish Panacan. Ang maongselebrasyon sa Eukaristiya nahimong usa ka makahuluganon nga paghalad sa mga pag-ampo, pasalamat, ug bag-ong paningkamot sa pag-alagad kay ang gugma sa Diyos nga naglihok pinaagi sa matag kasingkasing nga andam moalagad. (SoCCom Ministry News Writers of San Miguel Parish Panacan)