Ang Nabanhaw Nga Dios Nagauban Kanato

Ika-3 na Domingo sa Pagkabanhaw sa Ginoo (April 19, 2026)
Acts 2:14, 22-33 / Ps 16:1-2, 5, 7-8, 9-10, 11 / 1 Pt 1:17-21 / Lk 24:13-35

Bisan tuod nga sa sinugdan, kung kita puno sa problema ug kalisod, dili nato mailhan ang Ginoo, siya nagauban kanunay kanato.

Bisan usahay kita molihis sa atong paglakaw tungod sa atong mga sala, kita ubanan niya sa panaw. Molakaw siya uban kanato bisan sa kakulang sa atong pag-ila Kaniya.

Siya nagapanaw uban kanato matag basa ug pagpamalandong nato sa Pulong sa Ginoo. Ipatin-aw niya kanato diha sa atong paghinuklog sa iyang pulong kung kita mohatag og higayon sa pagpaminaw Kaniya.

Ang iyang pag-uban kanato iyang ipabati diha sa Santos nga Eyukaristiya. Ang tawo nga kanunay nagsaulog sa Misa, sama kang Kristo nga gipikaspikas, mahimo usab nga mapaambit ngadto sa uban. Bisan sa kalisod sa panahon karon, sa taas nga mga presyo, ang nagasimba kanunay makabaton sa kabuhong sa presensiya ni Kristo ug dili magkulang tungod kay ang iyang grasya mobuhagay kanila. Siya mailhan nato kung kita usab mahimong andam nga mapikas ug mo paambit sa unsay anaa kanato.

Si Jesus kung atong mailhan na, mosalig kanato nga nahimong misyonero. Mao nga nahanaw siya sa dihang siya nailhan na sa mga tinun-an. Mosalig siya kanato nga maoy mopadayon sa iyang buhat sa pagsangyaw sama kang Pedro sa unang pagbasa. Sa atong pagsalig Sama sa giingon sa ikaduhang pagbasa nga kita giluwas, kita usab mahimong dalan alang sa kaluwasan sa uban.

Busa sa atong panaw bisan usahay naglibog ug maglisod kita kon hain na ang nabanhaw nga Dios, ayaw siraduha ang imong kaugalingon sa Dios nga nagauban kanunay kanimo. Sama sa Salmo, ipakita gayod niya ang dalan alang kanato.