Catholic Faith Formation Seminar Gipahigayon sa Parokya sa San Isidro Labrador Lumondao

Ang sitwasyon sa kasamtangang panahon ug ang atong mga kasinatian sa kinabuhi nag-atubang og dakong hagit sa pagkamalahutayon sa atong Kristohanong pagkinabuhi. Matud pa sa kantang “HAGIT SA EBANGHELYO”… apan kon tinud-on ta ang pagserbisyo, mosubay ta’g kalbaryo, sama sa atong Ginoo… Dili sayon ang pagsunod kang Kristo; Daghang tunok ang dalan nga agian mo; Bug-at ang krus nga pas-anon mo…”

Tungod niini ang tawag sa pagpalawom ug paglig-on sa atong relasyon ug pagtoo kang Kristo nagkinahanglan ug kalambuan sa atong Espirituhanon nga kinabuhi pinaagi sa padayon nga pagtoon sa mga Doktrina Sa Simbahang Katoliko.

Nagkahiusa ang Formation Team sa Parokya nga magpahigayon og Spiritual Enrichment Seminar alang sa tanang GKK Servant Leaders. Tumong ug panghinaut nga ang matag pangulo mas magmadasigon sa pagpadayon ug magmalahutayon sa pag-alagad sa katilingban nga nahimo silang piniyalan. Inubanan sa pagtugot sa among Kura Paroko nga si Fr Efren Gubac, Jr., ang Spiritual Enrichment Seminar gipahigayon niadtong Abril 18, 2026, Sabado.

Gidapit sa Formation Team ang Catholic Faith Defenders of the Archdiocese of Davao nga mahimong mamumulong sa ipahigayon nga Spiritual Enrichment nga adunay Tema: “STANDING FIRM IN THE TRUTH: A CATHOLIC FAITH FORMATION SEMINAR” Gibahin sa lima ka topics ang maong Tema- DIVINE REVELATION-SACRED TRADITION, SACRED SCRIPTURE and THE MAGISTERIUM nga gihatag ni Bro. Isahel Alfonso; THE HOLY TRINITY AND CHRISTOLOGY ni Bro. Mark Dharryl Lampitok; ECCLESIOLOGY AND PROTESTANTISM in GENERAL ni Bro. Roy Priego; ICONOGRAPHY and THE VENERATION of the BLESSED VIRGIN MARY AND the SAINTS ni Bro. Earl Carino ug THE SACRAMENTS AND THE HOLY EUCHARIST ni Bro. Ryan Mejillano.

Adunay 334 ka mga GKK Servant leaders ang mitambong sa maong seminar. Gipahigayon usab ang Santos nga Misa pagkahuman sa ikaduhang topic bag-o ang afternoon sessions. Ang Santos nga Misa mao ang sentro sa atong Pagtoo. Gitapos ang maong panagtigom sa open forum diin adunay mga pagpaklaro bahin unsa pa ang mga pruweba o mga bersikulo sa Balaang Kasulatan nga si Kristo tinood gayud nga Dios; Unsa gayud nga adlaw ang Adlawng Igpapahulay?; mga pangutana kabahin kang Birhen Maria… Ang mga pangutana gihatagan og katin-awan sa mga mamumulong sa Catholic Faith Defenders. Nahimong malampuson ang maong Spiritual Enrichment Seminar. Matud pa sa Kura Paroko, Rev. Fr. Efren Gubac, Jr., nga sugod pa lamang kini nga panagtigom aduna pay mahimong ongoing Spiritual Enrichment diin magahisgot sa kabahin sa mga sukaranan sa atong Pagtoong Katoliko nga mao ang kinahanglan aron mamahimo kitang lig-on isip mga piniyalan sa katilingban.

DALAYGON ANG DIOS!

(By Echerica U. Yamba, SocCom Coordinator SILP Lumondao)