“Padayon Bisan Lisod” Kasinatian Sa Mga GKK Soccom Sa HFP-Baliok

“Padayon bisan lisod!” Mao kini ang kasagarang nabungat sa mga miyembro sa Social Communications Committee (SoCCom) atol sa regular nga quarterly meeting sa Parokya sa Sagrada Pamilya niadtong Marso 29 gikan 8:30 sa buntag hangtod 12:15 sa udto.

Bag-o nagsugod sa pagtuki sa mga hisgutanan, nagpahigayon una og spiritual conversation nga haum sa gipagawas nga resulta sa nilabay nga synod. Kini gibuhat aron makabalik lantaw sa mga kaagi isip usa ka miyembro sa SoCCom ug sa Gagmayg Kristohanong Katilingban.

Sa unang higayon, gipaambit sa matag miyembro sa grupo ang ilang kasinatian isip usa ka SoCCom. Kasagaran, nakasinati og kalisdanan sa pagkab-ot sa aktibong partisipasyon sa mga miyembro sa GKK. Gani bisan sa pagkuha sa mga detalye alang sa membership form, pabalik-balikon pa sa pipila ka higayon, daghang rason sa dili dayon pagbalik sa mga form. Aduna pay magdumili sa paghatag sa ilang mga detalye kay kuno very personal ang mga details. Usa pod sa mga kalisdanan sa mga SoCCom ang pagbahin sa oras kon dunay mga aktibidad tungod kay kasagaran nanarbaho man.

Tungod sa mga kasinatian nga natala, daghan na ang gusto nga muhawa sa ministriya kay gikapoy ug gipul-an na kay sa matag tuig walay nabag-o, mao lang gihapon. Dili magpakabana sa mga kalihukan sa GKK bisan kapila na ichat, itext, hatagan og sulat pahibalo. Gasto kaayo sa papel ug sa ink, unya di lang man gihapon magpakabana.

Sa ikaduhang hugna sa pag-inambitay, ilang natino nga grabe man diay kadaghan ang buluhaton sa SoCCom o secretary sa GKK sama na lamang sa record keeping, pagmantala sa mga panghitabo sa katilingban, paghimo sa mga pahibalo, pag-andam sa mga programa panahon sa pista, paglista sa pamisa sa kalag ug pasalamat matag misa, pag update sa GKK Registry ug GKK Profile, pagtambong sa meeting matagbulan, pagdistribute sa DC Herald, pagkuha ug mga litrato kon adunay aktibidad aron ipost sa GKK Social Media ug uban pa.

Daghan gayod diay! Mao nga moatras ang kadaghanan nga ma-appoint kay walay time ug busy pod sa laing pang adlaw-adlaw nga buluhaton. Nanghinaot ug nag-ampo ang mga miyembro nga aduna pay laing mudawat sa kaakuhan sa ministriya kay kini ginganlan man og Social Communications Committee, pasabot dili lang usa ka tao ang ana sa ministriya sa matag GKK.

Sa pagpadayon sa panag-istorya natubag ra pod nila ang pangutana nga, “Nganong nagpadayon pa man kita hangtod karon nga kapoy man kaha?” Ania ang pipila sa mga tubag:

• Yes, hago apan kini ang akong misyon
• Tinuod nga kinahanglan og taas nga oras ang igahin sa pagpangalagad apan, angay nako kining ibalik pinaagi sa akong pagpalangad kay ang oras ug panahon gasa kanako gikan sa Dios
• Gihatagan ako og talento sa Diyos, ako pod kining gamiton pinaagi sa pagserbisyo isip miyembro sa SoCCom
• Gitawag ko sa Ginoo, kinsa man ako nga mubalibad
• Baskog ko, wala koy sakit, himuon nako ang akong tahas isip pasalamat
• Wala man ako’y igong bahandi nga ikadalit sa simbahan, akong ihatag ang akong panahon sa pagserbisyo
• Giluwas ako Niya sa sakit, ako magabalos pinaagi sa akong pagserbisyo isip SoCCom

Sa katapusang bahin sa pag-inambitay, sila nagkanayon, “ Padayon bisan lisod!” Sila nanghinaot sa kanunay nga suporta sa mga kaubanang GSLs labi na gayod ang mga Pangulo sa Katilingban. Sila nanghinaot nga hatagan sa Dios ug dugang kusog ug kabaskog aron sa paglambo sa ministriya ug sa matag-GKK nga ilang girepresentar. Ato silang iampo nga sila magpadayon sa ilang misyon! (Flor Arellano- Deloria | HFP, SoCCom)