Sunda Kinsay Angay Nga Sundon

Ika-4 na Domingo sa Pagkabanhaw sa Ginoo (April 26, 2026)
Acts 2:14, 36-41 / Ps 23:1-3, 3-4, 5, 6 / 1 Pt 2:20-25 / Jn 10:1-10

Unsa ba nga klaseng pangulo ang dali nga sundon? Kanus-a ba kita makabig sa pagsunod sa kinsay nanguna kanato?

Sa Ebanghelyo, si Kristo isip maayong magbalantay, nailhan ug gisunod sa iyang panon. Sayon ang pagsunod sa usa ka pangulo kung siya tinuoray nga imong nailhan kung unsa siya kamaayo. Mao gani nga ang bisan kinsa nga gusto magpapili panahon sa eleksiyon maningkamot magpakitag kaayo sa mga tawo. Kung nailhan nimo unsa ka maayo ang usa ka ka tawo, halos dili ka makabalibad sa bisan unsay iyang ihangyo, kay nakaila ka man kaniya. Nailhan mo ba unsa kamaayo ang Ginoo kanimo? Imo ba siya nga gisunod?

Sa ikaduhang pagbasa, ang pasensya maoy susi sa pagsunod sa lakang ni Kristo. Kini grasya gikan sa Dios. Sama nga si Kristo, puno sa pasensya mihalad sa iyang kaugalingon aron pagluwas kanato, ang tawo nga gigrasyahan sa pasensya layo ang maabtan. Dili siya maluya dayon sa kalisod sa pagtuonbo trabaho. Dili siya moatras dayon kung adunay babagbo hagit sa rekasyon. Dili siya mobalos dayon kon siya dauton. Mas ganahan gayod usab kita sa tawo nga puno sa pasensya. Siya nakaambit sa pasensya sa Dios. Aduna ka bay pasensya aron usab sundon ka?

Sa unang pagbasa, si Pedro, sa iyang pagsangyaw, nakatandog sa mga namati kaniya. Daw gikumot ang ilang kasing-kasing sa mensahe nga ilang nadungog. Tungod niini, daghan ang nagtinguha sa bunyag. Ang ilang natandog uug daw gikumot nga kasing-kasing nakatukmod kanila sa pagpaduol sa Ginoo ug pakiglambigit sa isigkatawo. Kung natandog ka sa mensahe sa Ginoo, giunsa ba nimo kini paghubad sa buhat?

Sa atong pag-ampo alang sa kalinaw niining panahon sa krisis, atong pakawman ang pag-ila sa Ginoo, atong dugangan ang pasensya, ug tugutan nga nga makatandog kita sa uban human kita natandog sa mensahe sa Dios. Hatagan unta kita sa himaya sa iyang anak.