Blessing of SoCCom Ministry and Arkanghel Media Team

Niadtong Mayo 17, 2026, gisaulog sa Simbahan ang Solemnidad sa Pagsaka sa Langit sa atong Ginoo. Dungan sa maong kasaulogan mao ang 60th World Day of Social Communications, gipangunahan ni Rev. Fr. Rolando O. Mandreza, Kura Paroko, ang pagpanalangin sa mga miyembro sa Social Communications Ministry ug Arkanghel Media Team, San Miguel Parish, Panacan — mga alagad nga naglihok sa natad sa komunikasyon ug ebanghelisasyon, gikan sa social media hangtod sa mga GKK.

Atol sa maong pagsaulog, gipaambit usab ni Fr. Lando ang mensahe ni Pope Leo XIV nga “Preserving Human Voices and Faces,” nga nag-awhag sa tanang magtutuo sa responsable ug makatawhanong paggamit sa teknolohiya ug artificial intelligence. Gipahinumdoman usab ang tanan sa kamahinungdanon sa pagpanalipod sa dignidad sa tawo, paglikay sa digital manipulation ug pagpang-abuso sa media, ingon man sa pagpalambo sa digital literacy sa panahon karon.

Usa kini ka pahinumdom nga ang komunikasyon dili lamang pagpasa og impormasyon, kon dili usa usab ka misyon sa pagdala sa kamatuoran, paglaum, ug Ebanghelyo ngadto sa katawhan.

Sama sa saad ni Kristo sa Ebanghelyo, padayon nga nagauban ang Espiritu Santo sa mga misyonerong gitawag sa pagpadayon sa buluhaton sa ebanghelisasyon, bisan pa man sa digital nga kapanahonan. (Arkanghel)