Flores De Mayo, Paghalad og Bulak ug Paghalad sa Kasingkasing sa Maayong Buhat

Gilunsad ang Flores de Mayo sa San Pedro Cathedral niadtong Mayo 1, 2026, pinaagi sa usa ka Santos nga Misa nga gipanguluhan ni Rev. Msgr. Paul A. Cuison, rector sa katedral, inubanan ni Rev. Fr. Evan Esmade, CP.

Nalipay pag-ayo si Msgr Paul, sa mainiton nga presensya sa mga kabataan niining paglunsad sa Flores de Mayo. Nahimo nang batasan matag bulan sa Mayo ang paghalad og mga bulak alang kang Birhen Maria. Ingon pa niya nga na experience niadtong bata pa siya, nga halos maupaw ang mga tanom sa eskwelahan ug mga panimalay nga adunay mga kabulakan, kay maoy ilang panguhaon, apan imbis nga masuko ang tag-iya, mahimoot na lang kay nakahatag kini og dakong kalipay sa kasingkasing.

Nganong maghalad man kita og bulak? Ang bulak hulagway sa atong gugma ug paghigugma. Imbis masuko, kita mopahiyom na lang, ug gitudloan usab kita nga dili lamang ang bulak ang importante, kon dili ang kasingkasing nga naghalad niini. Giawhag ug nalipay usab ang pari sa mga katekista nga naningkamot paggiya sa mga bata nga magkinabuhi subay sa kabubut-on sa Dios, diha sa pagbuhat og maayo, sa paglikay sa dautan ug sa mga tintasyon.

Ang labing importante nga matudloan ang mga kabataan sa pagbaton og hiyas, sa pagtahod sa atong langitnong Amahan, pagbuhat og mga butang nga makapahimuot sa atong langitnong Inahan nga si Birhen Maria.

Ug atol usab niadtong adlawa mao ang kapistahan ni Sr. San Jose ang mamumo-o, ug nga gipahimangnoan usab kita sa kamahinungdanon sa atong trabaho. Ang atong trabaho nga maoy atong magamit sa pagsuporta sa pamilya, ug kini mahimong balaan kon ihalad nato sa Dios. Ang buhat sa Dios mao ang pagbalaan sa atong adlaw-adlaw nga panginabuhi.

Hinaut unta nga kining mga kabataan mahimong magmalampuson ug magmabungahon diha sa ilang buhat nga maayo.

Sa laktod: Ang Flores de Mayo dili lang paghalad og bulak. Paghalad kini sa kasingkasing, sa maayong buhat, ug sa kinabuhi nga nakahimuot sa Dios ug kang Birhen Maria. (Rosalinda Jabonillo | SocCom Coordinator, San Pedro Cathedral)