Gipadala sa Pulong ug Misyon: 13 ka Bag-ong Katekista Gipadala sa SRP Malabog

Human sa tulo ka adlaw gikan Mayo 1-3, 2026, nga madasigong pagtuon ug pagpamalandong,13 ka bag-ong Katekista ang pormal nga gipadala aron moalagad sa ilang mga Gagmay nga Kristohanong Katilingban (GKK) sa San Roque Parish-Malabog.

Ang New PSP Seminar gidumala sa Core Group sa mga Katekista nga gipangulohan sa PSP Parish Coordinator nga si Ruth C. Casanillo uban sa dakong pagtugot ug pagsuporta sa Kura Paroko Reb. Padre Amado B. Arroyo, ug kini gipahigayon sa Fr. Balaquinto Hall.

Gihimo ang seminar isip tubag sa sitwasyon diin adunay mga GKK nga walay mga Katekista o kulang ang ilang Katekista. Tumong niini nga mahatagan og bag-ong mga magtutudlo sa pagtoo ang mga katilingban ilabina ang mga kabataan.

Sulod sa duha ka adlaw gisangkapan ang mga partisipante sa 11 ka importanteng mga topiko aron mahimong epektibo ug andam nga mga alagad. Giklaro nga ang tawag sa pagka katekista dili trabaho, kini usa ka bokasyon. Dili ang katekista ang nagpili sa Diyos, apan ang Diyos mismo ang nagtawag kaniya pinaagi sa Simbahan ug sa panginahanglan sa katilingban. Ang matuod nga katekista gitawag gikan sa iyang kahuyang wala nagkinahanglan og perpekto, apan andam nga magpakatinood ug magpabag-o. Gipadala ngadto sa katilingban ang iyang misyon dili lang sa eskwelahan apan ang tibook GKK, ilabina ang mga pamilya nga nalimot na sa pag-ampo. Isip katekista dili lang magtutudlo sa doktrina sa Simbahang Katoliko, apan magpakabana sa kinabuhi nga angay’ng sundon. Kini nga tawag maoy naghatag og kahulogan nganong bisan walay sweldo ug bisan lisod ang dalan, mopadayon gihapon ang mga katekista. Kung ang tawag maoy sinugdanan ang Commitment mao ang magpabarog o magpalig-on niini hangtod sa katapusan kay kini ang kasing-kasing sa bokasyon.

Adunay 3 ka haligi ang commitment sa Katekista nga angayan nga pagahuptan: Una Commitment sa Diyos, ang katekista dili makahatag kung wala siyay ginadawat gikan sa pag-ampo, Misa ug Pulong sa Diyos, dinhi gikan ang kalig-on kung naay kaluya mga temptasyon. Ikaduha, Commitment sa Simbahan, dili siya nag-inusara, kabahin siya sa Parokya ug sa Katilingban. Ang pagkamasinugtanon sa Kura Paroko ug sa Pormasyon maoy timaan sa tinuod nga alagad. Ikatulo, ang Commitment sa Katilingban, ang pagsalig nga mobalik matag Semana, mag-andam sa leksyon ug moduyog sa kasakit ug kalipay sa GKK maoy pinakabililhong bahin sa bokasyon, kay kung wala ang klarong tawag dali ra moundang kung kapuyon na ug kon walay Commitment ang tawag magpabilin lang nga sentimento. Apan kung mag-uban ang duha mamahimo silang Katekista nga molahutay. Gikan sa Diyos, alang sa Diyos uban sa katawhan sa Diyos.

Ang kulminasyon sa Seminar nahitabo adlaw’ng Domingo, Mayo 3, 2026 atol sa ikaduhang Santos nga Misa nga gipangulohan ni Rev. Fr. Amado B. Arroyo. Kini timaan sa ilang opisyal nga pagsugod sa Misyon isip mga alagad sa Pulong sa Diyos.

Congratulations, ug Malipayong Pagsangyaw, mga bag-ong Katekista! (Arlene R. Tarnate – San Roque Parish,Malabog – SoCCom)