Lahutay sa Maayong Buhat

Ika-6 na Domingo sa Pagkabanhaw sa Ginoo (May 10, 2026)
Acts 8:5-8, 14-17 / Ps 66:1-3, 4-5, 6-7, 16, 20 / 1 Pt 3:15-18 / Jn 14:15-21

Unsaon ba paglahutay sa maayong buhat? Taliwala sa mga tentasyon, unsaon ba nga makapadayon sa pagpuyo nga malipayon nga sumusunod ni Kristo?

Sa Ebanghelyo, tataw nga ang gugma makapawagtang sa obligasyon. Kadtong nahiguma sa Dios motuman sa iyang mga sugo dili tungod kay napugos o nahadlok, apan tungod sa kalipay sa paghigugma. Kung ikaw tinuod nga nahiguma sa Dios kalipay mo ang pagbuhat sa iyang gisugo bisan pag tintalon ka sa male-maletang kwarta, bisan pag bayran ang imong prinsipyo og milyones nga salapi, bisan pag bayloan kag daghan nga kabtangan. Kung ikaw may gugma sa Dios kalipay mo ang pagsunod nga malig-on og baruganan sa iyang gisugo ug dili ang haylo nga kalibotanon.

Sa ikaduhang pagbasa, si San Pablo nagpahimangno sa pagbalaan Kang Kristo pinaagi sa pagpasabot sa pagtoo ug pagpakita sa maayong buhat. Ang mapaubsanon ug molahutay taliwala sa pagpangyubit ug pagsaway dili maulawan. Ang malinawong konsensiya ug pagpabilin sa kaayo bisan sa mga pagbiay-biay, makaangkon sa kalinaw sa kasing-kasing. Kung na sayod ka nga, wala kay sayop nga gihimo, dili ka manumbaling bisan ikaw dauton. Kung wala kay anomaliya batok sa imong kumpanya o trabahuan o katilingban, dili ka matarog bisan pag pasanginlan ka. Palabihon mo ang pagpadayon sa maayong buhat bisan dunay sakripisyo kaysa pagbuhat sa dautan.

Sa unang pagbasa, ang dautang espiritu napapahawa ni Felipe. Ang katawhan nga nakasaksi sa maayong buhat sa mga tinun-an ni Jesus nagmaya. Namati sila ug misunod sa mga pagtulon-an tungod sa pagsaksi sa gahum sa mga tinun-an. Kung nadawat nimo ang gahum ug kaayo sa Ginoo, makadasig ka pinaagi sa pagharong sa bisan unsa nga dautan. Makahimo ka nga makapalagpot sa may mga dautang tinguha pinaagi sa imong gahum sa pagpaubos ug pagsalig sa Dios. Makalimpyo ka sa uban, makapalig-on ka sa nangaluya, ug makapahigmata ka sa nahikatulog sa sa ilang responsibilidad.

Busa, ang gugma, pagbalaan, pagsaksi maoy susi sa mapadayunong buhat sa kaayo. Kung kini atong mapuy-an, makalahutay kita sa buhat nga maayo ug makaingon gayod kita nga ang kalibotan magdayeg sa Dios sa kalipay.