Pakighiusa sa Lawas ni Kristo, Sustansiya sa Atong Panaw

Solemnidad sa Balaang Lawas ug Dugo ni Kristo (June 7, 2026)
Deut 8:2-3, 14b-16a / Psalm 147:12-13, 14-15, 19-20 / 1 Cor 10:16-17 / John 6:51-58

Nasinati karon sa kadaghanan ang kalisod ug kagutom. Dunay uban nga maglisod pagpangitag igo nga makao ikatulo sa usa ka adlaw. Unsaon ba nato pag-atbang kining maong hagit karon?

Tataw ang hinungdan ngano nga nakasinati og kapait ug kagutom ang mga Israelita, sa unang pagbasa. Kini tungod kay ang Dios nga nagpakaon kanila buot nga makaamgo sila nga ang tawo mabuhi dili sa pan lamang kondili sa matag pulong nga mogula gikan sa baba sa Ginoo. Gipakaon mo ba ang imong kaugalingon sa Pulong sa Ginoo matag adlaw? Gihatagan mo bag bili ang pulong sa Ginoo diha sa pagsaulog sa iyang pulong?

Gipaklaro ni San Pablo sa ikaduhang pagbasa nga ang pan nga gipikas-pikas mao ang atong pakighiusa diha sa lawas ni Kristo. Pinaagi sa pagsaksi ug pag-ambit nato sa pagpikas sa pan, kita nahiusa sa atong isigkatawo. Nagbunga ba ang imong pagsalmot sa Misa diha sa tinuoray nga paghuna-huna ug pagbuhat og unsay makatabang o makaayo sa imong isigkatawo? Nahimo mo ba ang misyon human sa Misa diin ikaw gipadala aron sa katilingban ugvsosyodad ang imong mga buhat sa trabaho o negosyo, sa Simbahan o politika, makaayo dili lamang alang kanimo kondili sa kadaghanan?

Sa Ebanghelyo, ang mokaon sa lawas ni Kristo ug moinom sa iyang dugo, mabuhi. Ginaingon nga kung unsay atong gikaon mao usab ang dangatan sa atong kaugalingon. Ang makahimo niini magpakita sa iyang buhat sama sa kinaiya ni Kristo. Ang mapuno sa sustansya ni Kristo maliwat ug dili makahimakak sa pagpuyo kinabuhi nga subay sa makapahimuot kaniya Natakdan ba ang imong batasan sama ni Kristo sa imong pagkalawat kaniya? Ang imong pagsimba nakapahimo ba nimo nga buhi nga saksi sa presensiya ni Kristo bisan Asa, ka moadto, sa panimalay, sa palengke, sa trabahoan o sa kadalanan?

Sa atong pagsaulog sa Balaang Lawas ug Dugo ni Kristo, ato untang mabusog ang atong kagutom sa iyang mga pulong. Ato unta nga mapuy-an ang pag-ambit ug pagbati sa kahimtang sa usag usa aron kita adunay tinuod nga kahiusa. Maporma unta sa hinay-hinay ang atong mga kinaiya sama Kang Kristo nga maoy atong gikalawat.