Photojournalism: Hinagiban sa Pagsaysay sa Kinabuhi sa Simbahan

Usa ka makahuluganon ug makapadasig nga Photojournalism Seminar-Workshop ang malampusong gipahigayon niadtong Abril 26 sa Holy Family Parish Pavilion sa Baliok, Davao City.

Gipangunahan kini sa inila ug multi-awarded nga photography enthusiast ug kanhing Presidente sa Davao Photographers Club, Mr. Jun Flores. Sa maong higayon, ang mga partisipante gitudluan sa nagkalain-laing teknik ug hustong pagpangandam sa pagkuha og mga litrato, ilabi na sa mga kalihukan sa simbahan.

Ang mga partisipante naggikan sa pundok sa GKK Social Communications Committee (SoCCom), Parish Social Media Team, ug PYA Media Ministry. Mapasalamaton ang mga nanambong tungod sa dugang kahibalo ug praktikal nga estilo sa pagsaysay sa istorya pinaagi sa litrato.

Gikalipay usab sa mga partisipante ang suporta ug presensya ni Janoz Laquihon, Presidente sa Davao Photographers Club ug ni RJ Dela Cruz, Bise-Presidente nga naghatag og inspirasyon sa tanan sa paggamit sa photography isip usa ka gamhanang paagi sa pagmantala sa mga kalihukan sa simbahan ug sa komunidad.

Tinuod gayod nga usa kini ka mabungahong adlaw sa pagkat-on—usa na usab ka mahinungdanong lakang sa pagpalig-on sa ministriya sa Social Communications sa Parokya sa Sagrada Pamilya. Nakaamgo usab ang mga partisipante nga ang Photojournalism usa ka mahinungdanong hinagiban sa pagsaysay sa kinabuhi sa simbahan. Kini gihuptan nga usa ka hiyas nga naangkon sa matag-usa.

Dako usab ang pasalamat sa Parish SoCCom Coordinator sa mga Pangulo sa Katilingban sa pagpadala sa ilang mga partisipante ug labaw sa tanan sa kura-paroko, Fr. Dionisio Tabiliran, DCD sa makanunayong giya ug suporta. (Flor Arellano-Deloria – SoCCom Coordinator, Holy Family Parish, Baliok)